Den un defensa fuerte pa siguridad di nos ciudadanonan riba caminda, Parlamentario Endy Croes a elogia e trabou legislativo di su coleganan di fraccion, Edgard Vrolijk y Rocco Tjon. Danki na e iniciativa aki, Aruba awor tin leynan mas skerpi pa castiga coremento di auto iresponsabel, frena e aumento di accidente y caba cu e cultura di “intocabelnan” den e gobierno actual.
Un baricada contra iresponsabilidad
Croes a gradici Vrolijk y Tjon pa nan determinacion den bini cu e cambionan den e Landsverordening Wegverkeer. “Esaki ta un ley cu ta bin di curason di MEP pa proteha famianan Arubiano,” Croes a declara.
- Castigo mas pisa: E pena maximo pa infraccionnan grave den trafico a wordo aumenta di 4 aña pa 8 aña.
- Claridad legal: No tin espacio mas pa “interpretacion”; e ley ta bini cu un definicion structural pa kico ta roekeloos rijden.
E berdad cu AVP-Futuro kier sconde
Cu data den man, Croes a confronta Parlamento cu e realidad amargo di aña 2025. Segun cifranan oficial di Korpschef (31 dec 2025), accidentenan cu herido a subi drasticamente:
- 2024: 463 accidente.
- 2025: 625 accidente (un aumento di 35%).
“E cifranan aki ta e prueba cu e maneho di AVP-Futuro a fracasa. Ora bo no tin autoridad moral, bo no por exigi disciplina riba caya,” Croes a enfatisa.
Marco Espinoza: E bibo ehempel di iresponsabilidad
Pa e Parlamentario, e ehempel di mas bisto di e decadencia di e gobierno aki ta e caso di Marco Espinoza, hefe di prensa y “yiu adoptivo” di Mike Eman.
“Mientrastanto Gobierno ta pidi Pueblo pa comporta nan mes, nan mesun hefe di prensa, cu un salario di 10.000 florin pa luna, supuestamente a keda envolvi den un accidente ‘pata pata burachi’ na Tanki Flip/Pos Abou,” Croes a splica. El a cuestiona fuertemente con AVP a “tapa” e caso aki y con e personanan aki ta sigui graba propaganda pa gobierno manera nada no a pasa.
“Danki na e esfuerso di Vrolijk y Tjon, e tempo di ‘get away with murder’ a caba pa e amiguitonan di AVP. Transparencia no ta un slogan pa campaña, e mester wordo aplica pa tur hende igual. Den ‘Futuro’, e ley aki lo conta pa Marco Espinoza tambe!”, Croes a termina bisando.
