Palabra di Dios ta bisa : Pesey un homber lo bandona su tata y su mama e lo uni cu su esposa.y nan dos lo bira un carni.
Na prome lugar e palabra di Dios ta bisa, cu e homber ta bandona cas di su tata y su mama, nos ta pone enfasis riba esey pasobra ta cumbini tur hende cu ta bay contrae matrimonio, pa nan tin nan cas, of appartement, y esnan cu por tin nan propio cas prome nan casa, pa asina nan dos por ta hunto nan dos so y conoce otro miho.
Bandona cas ta nifica , bay bini riba boso mes, y separa boso mes for di cas di boso mayornan, tanto emocional, como econonicamente.
Pa asina boso cu ta den un relacion matrimonial nobo, cuminsa organisa boso bida den e boluntad di Dios,y experiencia Su palabra cu ta bisa boso ta un solo carni den tur cos.
No lubida cu matrimonio a wordo institui door di Dios, y e ta un convevio entre un homber, un muher y Dios.
Esey ta nifica cu si algo pasa, ta Dios mester wordo consulta, pasobra e ta para garantia pa boso matrimonio, ta mescos cu ora bo cumpra un auto nobo na agencia, e tin garantia, y si algo zona robes den e motor bo no por bay serca mecanico di bao di palo pasobra bo tin garantia di Agencia.
Nos ta duna e ehempel aki, pasobra tin hopi hende cu a caba di casa, cu ta bira emocional ora algo sosode y ta cuminsa busca conseho links y rechts, riba facebook, via whatsup, consultando cu amigo y amiga, of cu hendenan cu a divorcia y cu hopi no ta bisa e berdad pa kico nan a divorcia, ni tampoco na unda e problema a cuminsa.
Por fabor por ehempel si bo ta bini di un famia divorcia, no tuma esey como ehempel pa bo bisa awel mi tata y mi mama a divorcia, awel ami no ta tuma nada na man di ningun hende mi tambe ta divorcia.
Ta yega asina lew cu por yega na un cas caminda tin tres ruman cu a casa y tur tres a divorcia, e ora ey nos ta mira cu no por papia di mala suerte, pero di decisionnan robes tuma.
Di berdad matrimonio tin hooooopi enemigo, y manera mundo ta bayendo, hende mester tene cuenta ki sorto di hende bo ta tuma conseho serca dje.
Na prome lugar e mester ta un hende neutral cu conoce Palabra di Dios, y cu tin un curason cu ta papia boluntad di Dios, y cu ta hiba boso hunto dilanti di Dios, pa asina boso relacion cu Dios ta na ordo na prome lugar, y asina Dios resolve e asunto.
Hopi biaha hende ta busca conseho, ora nan decision ta tuma caba,y nan ta buscando last opinion, pasobra nan a tuma decision riba nan mes sin consulta cu Dios.
E palabra di Dios ta bisa den 1Corintionan 11:3 Mi kier pa boso comprende cu Cristo ta e cabes di tur homber,y e homber ta cabes di e muher, y Dios ta cabes di Cristo.
Un homber mester busca un bon relacion cu Dios, pa e por eherce locual Dios ta bisa den su matrimonio, un homber no por dirigi su hogar riba conseho di amigonan soltero, y tin hopi biaha den nan mes tin amigo nan envidioso di su matrimonio.
Ta masha peligroso, tuma conseho serca hende herida, y amarga, pasobra nan mes no a cura ainda di nan herida y nan no por conseha,
Sinceramente, Pastor Marcel Balootje
