Matrimonio tin tres enemigo, cu hopi biaha ta hende mes ta alimenta, duna nan cuminda, y asina nan ta crece, y trece division, cu ta hiba na divorcio y despues e hende mes kier tira falta riba otro, pero ta e mes a habri porta pa enemigo drenta.
Na prome lugar tur hende mester sa cu diabel ta odia matrimonio, pasobra den matrimonio e evangelio di Dios ta wordo proclama, manera Cristo ta stima su Iglesia.( Efesionan 5:22-33).
Matrimonio a wordo insitui pa Dios, y ta un convenio entre un homber , un muher y Dios.Pesey e palabra di Dios ta bisa , cu locual Dios a uni no laga ningun hende separa.
Na prome lugar e mundo ta un gran enemigo di matrimonio, pasobra e mundu ta ofrece libertinahe, cual un matrimonio , mester tene bon cuenta cune, pa no cay den trampa.
Nos tur sa cu ora un hende casa e mester ocupa su mes cu su esposa of esposo y no sigi biba un bida manera ta soltero e ta.
Nan dos a bira un y nan dos ta comparti tur cos, tanto den cas como pafo di cas, un tin cu yuda otro pasobra esey ta e mandato di Dios. Nan dos ta completa otro, y no competi cu otro.
Por ehempel ora tur dos ta traha, un persona so no por ta cubri tur gasto di cas , mientras cu e otro ta shop henter dia.
E asunto di trabao di cas, ta un kinderziekte cu mester wordo comparti, pasobra den bida matrimonial , trabao di cas no ta wordo poni riba nomber di muher , ni tampoco riba nomber di homber.
Pesey e palabra di Dios, ta bisa den Genesis 2:24 cu nan dos lo bira uno.
Y si nan a compronde e palabra di Dios bon, nan lo no discuti, pero hopi biaha, bo ta hanja cu e homber na su cas y tin biaha e muher na su cas ta su mama tabata haci tur cos pe.
Y tin biaha tambe tin hende a nace cu cria den cas, y cu nan mes nunca a haci trabao di cas of cushina y awor cu nan a casa ta nan mes tin cu cuminsa haci tur cos, pasobra e bida nobo no por afford e sistema bieu.
Pesey ta bon cu prome cu casa, sinta un rato y combersa entre pareha kico abo como muher por y kico e homber por haci den cas, pa evita cu despues diabel ta drenta y bo ta tende e famoso frase”Ta mi so tin cu haci tur cos den e hogar aki”, siendo cu sabiduria por wordo aplica pa comparti den amor tur locual mester wordo haci.
Na di dos lugar e Carni ta debil , y door di esey cosnan carnal ta lanta,
Manera hopi tempo riba telefon,
Hopi tempo dilanti di tv,.
Hopi tempo na trabao,
Hopi tempo riba caya,
Hopi tempo cu amigo y amiga,
Hopi tempo cu droga y alcohol,
Hopi tempo den pornografia,
Hopi tempo den Gym, y e relacion matrimonial ta wordo debilita, pasobra casamento no ta solamente bida sexual, pero e bida social y atencion duna na otro ta hopi importante.Mester inclui tempo pa otro, mester sinta planea, mester sinta dialoga.
Un homber mester zorg pa su muher bisti decente pasobra esey ta indentifica orden y respet den su matrimonio.
E diabel ta presenta ora cu algo sosode y ningun no kier papia di pordon. Y falta di pordon a destrui hopi matrimonio, esey ta e trabao di diabel, pa hende no pordona otro, asina trece division den famia.
Sinceramente, Pastor Marcel Balootje
