Si nos wak bon, ora un persona ta ganja un otro persona, esey ta un falta di respet, pasobra ora bo ta stima un hende di berdad, bo ta respeta e persona y bo ta evita di tur manera di decepciona e persona.
Mentira awe ta parce manera un salida, un forma di scapa, pero mayan e ta bira un lock, un candal , un circulo, un vicio, cual ta dificil pa sali for di dje, sin arepentimento, y pidi pordon, na Dios y na e persona cu bo a ganja.
Tin hende ta keda para riba nan mentira, y perde Trabao, Famia, Matrimonio,Negoshi, pasobra nan ta hinca den e cueba scur di mentira, cu nan a cuminsa pensa di ta berdad, y cu esey ta e mihor bida pa biba.
Laga nos menciona algun bida di mentira:
E bida di adiccion ta un bida di mentira, pasobra e no tin nada bon den dje.
E bida di adulterio ta un bida di mentira, pasobra e ta demostra cu esun cu a ocaciona e adulterio como un persona falso, e no ta respeta su pareha ,tampoco e ta respeta su yiunan y no tin temor di Dios.
Den un palabra bisa cu tur tipo di bida, caminda hende ta pretende di algo cu ta completmente contra boluntad y creacion di Dios, ta un bida di mentira, cual na final di cuenta lo trece decepcion.( Romanonan 1 :18-32).(Romanonan 2:5-11). Si no tin arepentimento.( 1 Juan 1:9).
Mentira ta di diabel, pasobra e diabel ta tata di mentira , su naturalesa ta di mentira, y no tin nada bon den dje, e palabra di Dios ta bisa cu e a bini solamente pa horta, pa mata, y pa desrui.
Mentira ta destrui confiansa den Matrimonio y Famia, y den tur otro cos caminda mentira por presenta e ta danja relacion, un mentira chikito ta trece un desconfiansa grandi.
Hopi biaha ora hende ta ganja riba otro y papia malo di otro y susha nomber di otro sin ningun base di berdad, nan no ta tene cuenta cu esey.
Colosensenan 3:9-10 ta para scirbi: No Ganja otro, como cu boso a pone un banda e hende bieu cu su practicanan malbado, y a bisti e hende nobo cu ta wordo renoba, den un conocemento berdadero segun e imagen di esun cu a crea e.
Pesey poniendo mentira un banda, cada un di boso,papia berdad cu su prohimo, pasobra nos ta miembro di otro.( Efesionan 4:25).
Ma papiando e berdad den amor, nos tin di crece den tur aspecto den dj’E, Kende ta e cabes esta Cristo.
Si nos wak bon no tin crecemento ni avance pa un mentiroso,
Semper e lo tin cu keda wak atras,
Ki dia e lo wordo descubri,
E bida lo ta intrankil, y hasta su salud ta na peliger, pasobra mentira por hiba hende asina leu, cu nan ta ganja nan mes y pone nan salud fisico y mental na peliger.
Pasobra tur locual hende sembra e lo cosecha, y Dios no ta laga ningun hende haci bofon di dj’E.
Prome cu un hende drenta matrimonio, e mester ta asina madura, pa bisa su futuro esposa, of esposo ken e ta di berdad, cual ta su testimonio y especialmente si e tin yiu, pa asina despues di casamento esey,no bira un punto di desconfiansa.
No saca ningun clase di mentira pa mantene hende serca bo, no tene miedo di perde un persona, pasobra miedo no ta amor berdadero, miedo ta mentira.
Palabra di Dios ta bisa , pa nos papia berdad,tur momento.
Sinceramente, Pastor Marcel Balootje
