G297 Na vanguardia di enseñansa, kier contribui na optimalisa funcionamento y rendimento di nos enseñansa en general; na mes momento nos kier stimula/envolvi tur actor relevante den y/o pa enseñansa pa hunto salvaguardia e interesnan fundamental di enseñansa pa nos alumnonan y comunidad.
Den e ultimo 5 luna, G297 a combersa cu Minister Endy Croes, Fundacion Lanta Papiamento, Comision Fiho di Parlamento pa enseñansa, SIMAR, IPA, DOW, KvK, Directornan di oficina di Directivanan di scol, Departamento di Enseñansa Aruba y tambe profesionalnan (individual) den sector di enseñansa.
ENSEÑANSA NA ARUBA ANNO 2022 MESTER DI NOS TUR!
G297 a analisa pasado di nos sistema di enseñansa desde e epoca colonial (WIC), e periodo Antiyano (Antias di seis) y mas recien e periodo di Status Aparte te cu awor. Nos di G297 ta conclui cu nos sistema educativo no a y no ta funciona optimalmente y pues mester di un revision urgente pa por funciona debidamente pa e era moderno di siglo 21.
E necesidad pa revision di nos sistema educativo a (bolbe) keda confirma durante e encuentronan menciona cu G297 a tene. Entre otro a bin dilanti: flexibilisacion di e structura educativo; diversifi cacion di e organisacion escolar y e fluho escolar (‘doorstroming’); actualisacion di e respectivo programanan escolar pa siglo 21, incluso e relacion ‘enseñansa – mercado laboral’; atencion pa e posicion di lenganan den enseñansa, particularmente Papiamento; renovacion y mantencion continuo di edificio di scol y facilidadnan escolar; mas inversion/financiamento pa enseñansa. Por ultimo, pero sigur no menos importante: profesionalisacion continuo di e maestronan di scol, como tambe demas funcionario educativo, manera personal di sosten na scol y otronan cu ta brinda nan servicio na henter enseñansa.
1986 Status Aparte Aruba:
Un propio Constitucion; un propio Parlamento, un propio maneho pa enseñansa!
Cu e nocion cu tur actor envolvi cu enseñansa y educacion di nos hobennan, pues no solamente e minister di enseñansa y Departamento di Enseñansa ta responsabel pa nos sistema educativo; pues nos tur y cada un di nos tin un o otro tarea pa cumpli cu educacion di nos hubentud y nos comunidad! Conhuntamente nos por fija e compas pa un propio maneho pa enseñansa pa futuro. For di un principio di e intercambio di idea cu tanto SIMAR y tambe IPA, G297 a haya nan cooperacion pa conhuntamente organisa e conferencia “ENSEÑANSA, NOS RESPONSABILIDAD”. Actualmente nos ta preparando e detayenan pa e conferencia; keda pendiente pa e contenido di e programa y oradornan di e conferencia, como tambe con pa registra pa participa na e conferencia.
