Actualmente e unico localidad cu tawata habri tur dia di dialuna pa diasabra tawata Centro Libertador Betico Croes. Club Don Bosco na Noord y Santa Teresita Center na San-Nicolas a traha ambos 3 dia den siman. Desde dialuna 29 di maart 2021 Santa Teresita y Den Bosco tambe lo ta bay ta vacunando di dialuna pa diasabra for di 8:30 pa 11:30 di mainta y di 2:30 pa 5:30 di atardi. Di e forma aki ta aumenta e cantidad di vacuna cu ta wordo duna pa dia aun mas. Actualmente ta vacunando un averahe di 1200 persona pa dia pero awor cu ta bay over na vacuna esnan cu malesa cronico of condicion di salud hunto cu profecionan cu ta bin den contacto cu hopi hende manera entre otro Korps Politie Aruba y Docentenan, ta nesesario pa amplia e capasidad di vacunacion pa dia aun mas.
Desde dialuna tambe MFA Savaneta ya no lo fungi como localidad di registracion mas, e localidad pa registra pa pariba di brug entrante dialuna 29 di maart lo bira Santa Teresita Center na San-Nicolas net pabou di misa na San-Nicolas. Orario pa registra na Santa Teresita Center ta di dialuna pa diasabra for di 8:30 pa 11:30 di mainta y 2:30 pa 5:30 di atardi.
E otro edificionan di MFA esta Santa Cruz, Paradera y Noord si lo sigui fungi como localidad di registracion.
