Entrante Diaranzon marduga, Toque de Queda ta bolbe na e orario di 12or di madruga pa 5 or di mainta.

0
279

Entrante Diaranzon marduga, Toque de Queda ta bolbe na e orario di 12or di madruga pa 5 or di mainta.

Oranjestad, 5 di October 2020, – Considerando e bahada di casonan positivo pa dia y tambe e cantidad di casonan activo. Crisis Team di Gobierno a tuma e decision pa ahusta e orario di Toque de Queda bek na con e tawata 3 siman pasa, esta di 12 or di madruga pa 5 or di mainta. Esaki lo drenta na vigor diaranzon 12 or di marduga. Pues pa tur hende compronde bon; durante e anochi di diamars crusando pa diaranzon mainta. E orario di ciere pa establecimentonan tambe ta wordo hala bek na e orario cu e tawata ta 3 siman pasa esta 11or di anochi y lo drenta na vigor diaranzon anochi.

Awe nos tawata tin 15 caso positivo nobo, 3 siman pasa nos tabata tin 141 caso positivo nobo y e cantidad di caso activo tawata riba 1600. Obviamente nos no kier bay bek na e cantidad aki, pues awor cu gobierno ta flexibilisa e medida di orario, tur hende mester sigui tuma responsabilidad pa cu nan conducta. Den e temponan aki di pendemia no por tuma e riesgonan sin proteccion. P’esey ta recomendable pa tur hende sigui usa tapaboca unda cu bo bay y den tur lugar paden e ta obligatorio, asina un ta cuida otro, esey ta e clave den e pandemia aki.

Gobierno por tuma medida drastico pa controla e plamamento di e virus of kita medida pa nos comunidad por haya bek poco ambiente di normalidad. Sinembargo locual mester bira normal ta nos actitud responsabel den e ambiente unda cu nos ta.

Nos capacidad na hospital no ta di un pais grandi sino di un isla. Si casonan bolbe aumenta e ta aumenta e cantidad di camanan ocupa na hospital y den ICU. Esaki ta locual nos tur mester tin den mente y evita.

E clave ta: Menos caso positivo pa dia, menos medida riba nos pais pa controla e virus. Mas caso positivo pa dia, mas medida negativo pa controla e virus. E ta realmente den nos man, hunto nos por control’e,

Aruba ta conta cu bo.

LEAVE A REPLY

Please enter your comment!
Please enter your name here