Gobierno di Aruba, hunto cu FCCA, ta invita comunidad cordialmente pa un momento cu prensa relaciona cu e renobacion di proyecto di edificio den bario di Mabon.
E iniciativa aki ta forma parti di un esfuerso continuo pa mehora calidad di bida den nos barionan, duna uzo nobo na espacionan existente y crea un ambiente mas digno, sigur y funcional pa su habitantenan.
Durante e encuentro, lo comparti mas informacion tocante e proyecto di renobacion, e impacto positivo pa e comunidad di Mabon y e siguiente pasonan den e desaroyo di e area.
E atencion duna na bario Mabon ta bisto desde e tempo cu Gabinete Mike Eman a tuma cargo algun aña atras, caminda varios proyecto a wordo realisa. Un di nan tabata e programa “Pinta bo Bario”, den cual casnan den Mabon a keda pinta y e edificio grandi (flat) a haya su colornan di “arco iris bibo”.
Durante e mesun periodo ey, a instala lusnan LED pa mehora iluminacion den e bario, y a duna atencion na e parke y pleinchi den e area.
Ademas, durante e añanan ey, tabata organisa accion di limpiesa na varios ocasion. Awo, bou Gabinete AVP-Futuro, Prome Minister Mike Eman ta continua cu e esfuerso aki, incluyendo accionnan reciente den bario di Mabon.
Den cada bishita na e barionan, Prome Minister ta scucha habitantenan pa identifica con Gobierno por sigui contribui. Den Mabon, ya a realisa diferente mehoracion, incluyendo construccion di un trapi y renobacion di e Mabon Heuvel (flat), cual anteriormente tambe a pasa pa un proceso di pintura y mehoracion.
Prome Minister Mike Eman ta conciente cu tin ainda hopi trabou pa realisa, no solamente den Mabon, pero den tur bario riba Aruba, y ta reafirma su compromiso pa sigui traha riba mehoracion di calidad di bida.
Invitacion na comunidad:
Fecha: Diamars 5 di mei 2026
Ora: 8:30 di mainta
Luga: Caya Butishi, Mabon
Prome Minister Mike Eman, hunto cu FCCA, lo ta presente pa e entrega oficial di e renobacion di e edificio. Bo presencia lo ta altamente aprecia mientras ta sigui traha hunto pa fortifica e bario y e comunidad.
