Di dialuna 2 te cu diabierna 6 di Juni 2025, a tuma luga na Sint Maarten un entrenamento forense special di sinku dia tocante un tecnica innovativo di analisis forense. E entrenamento aki, organisa pa CARICOM den colaboracion cu e Trinidad and Tobago Forensisch Science Centre (TTFSC) i e Korps Politie Sint Maarten, ta yuda polis resolve crimen cu arma di candela na un manera mas eficiente.
Seis investigado forense a participa den e entrenamento: dos di Korps Politie Curaçao, dos di Korps Politie Aruba y dos di Korps Politie Sint Maarten. Nan a siña un tecnica avansa cu por yuda atende crimen relaciona cu arma di candela na un manera mas rapido y efectivo. E entrenamento aki ta di gran importancia, mirando cu tur pais y isla den e parti Caribense di Reino ta enfrentando un aumento den caso di tiroteo. College van Korpschefs ta preocupa tocante e cantidad halto di arma di candela cu ta circula den nos region.
E entrenamento a bira posibel danki na un colaboracion regional mas estrecho entre College van Korpschefs y CARICOM IMPACS (Implementing Agency for Crime and Security). CARICOM IMPACS ta e organo di siguridad di CARICOM, funda na 2006 pa stimula un maneho coordina di crimen y siguridad den region. E organismo aki ta desempeña un rol clave pa estrecha e colaboracion entre polis, inmigracion, duana y e servicionan di inteligencia di e paisnan miembro. CARICOM IMPACS ta realisa proyecto regional, colecta y analisa dato tocante tendencia criminal y conseha e paisnan miembro tocante strategia di siguridad. Cu e tareanan aki, IMPACS ta contribui na hisa capacidad y efectividad di e servicionan di siguridad regional. Su sede principal ta na Trinidad y Tobago.
Tur participante a finalisa e entrenamento cu exito. Den su discurso na e ceremonia di entrega di certificado, Korpschef di Sint Maarten, Carl John, a enfatisa cu e colaboracion ya ta dunando resultado concreto, no solamente den forma di entrenamento manera esun aki, sino tambe intercambio di informacion mas rapido tocante e criminalnan cu ta move den region di Caribe pa comete delito. “Caribe no ta un luga sigur mas pa criminal,” segun John. El a bisa ademas cu e meta ta pa sigui fortalece e lasonan, entre otro pa medio di e di tres Encuentro Regional di Analista di Criminalidad, cu lo tuma luga mas den e aña aki.
Cu e colaboracion intensivo aki, nos region ta dal un paso importante den direccion di un Caribe mas sigur.
