Un curason trankil ta bida pa e curpa, ma envidia ta putrimento di weso.( Proverbionan 14:30).
Hende envidioso semper ta kere cu nan ta haci danjo na nan prohimo, pero sin sa cu nan ta haci danjo na nan mes.
Envidia ta un mal spirito, un emocion negativo, cu kier stroba otro persona pa bay dilanti, cu no ta desea pa un persona por crece, y mas ainda no por celebra e victoria di su prohimo.
Nos tur sa e envidia di Cain, e envidia di Saul, e envidia di e rumananan di Hose, e envidia di e ruman di David, y tur hende sa kico tabata e final.
E causa di envidia ta Orguyo, Inseguridad, Mal contento, y Falta di gratitud.
Awendia nos ta conoce hasta envidia politico, cual ta wordo yama oposicion, pero nos ta mira e hopi cla caminda tin hopi bringamento di otro, vengansa tur caminda , e ta wordo mira rond mundo, con hende ta bringa otro pa envidia, sin wak cuanto bida, esaki ta ta causando, con e pueblo ta bay perdi , pa motibo di envidia, con hende ta lanta contra otro instiga door di envidia.
Envidia ta un sentimento negativo, cu ta mustra cu mi no ta contento cu bo crecemento, ami kier haci mescos cu bo, of mihor cu bo, pesey mi kier stobabo di alcansa, pasobra mi ta desea di tin locual cu abo tin.
Ora envidia ta domina curason di hende, nan ta bira ciego, pasobra nan no ta wak locual cu nan mes por logra, pero nan kier stroba locual otro kier logra.
Envidia ta tur caminda den e mundo: spiritual, deportivo, politico, famia, educativo y hasta e enemigo a logra di mete envidia den bida e matrimonial, caminda dos persona cu ta yama pa biba bon cu otro pa testimonio pa nan yuinan, ta sinta envida otro pa cosnan material.
Santiago 3:16 ta mustra cu caminda ta existi envidia y egoismo, tin desordo y tur sorto di cos malo.
Marco 11:25 ta sinja nos cu caminda tin envidia oracion ta wordo stroba.Hende no por haci oracion mientras cu e tin otro na curason.
Envidia ta stroba madures spiritual,( Proverbionan 14:30).
Laga nos tene bon cuenta locual e palabra di Dios ta bisa: No stima mundo, ni e cosnan di mundo. Si un hende ta stima mundo, e amor di e Tata no ta den dje. Pasobra tur loke cu tin den e mundo, e deseo di carni, y e deseo di e wowo, y e orguyo di bida, no ta bini di e tata, sino di e mundo. Y e mundo aki ta pasa bay y su deseonan tambe, ma esun cu ta haci boluntad di Dios ta permanece pa semper.( 1Juan 2:15-17).
Pa vence envidia,mester di hopi oracion, pordon, y unidad, pa asina e famia por sali pa dilanti,pasobra hopi biaha nos ta mira cu envidia ta algo cu ta bini di generacion, y hasta por mira manera envidia ta birando cultura, y esey ta haci e asunto mas serio, pasobra hende envidioso no ta desea pa otro bay dilanti pero pa tur keda mesun cos.
Discriminacion ta bini door di envidia, caminda hende ta pensa cu nan rasa of nan color ta stroba nan di bay dilanti, y lubidando cu Dios a traha hende den Su imagen, y Su semehansa, y Cristo Hesus a bini pa tur cu kere den dj’E lo wordo salba, asina ta e oportunidad pa crece den tur sentido positivo di palabra tey pa nos tur igual.
Ningun clase di envidia no ta bon den bida di ningun hende.
Sinceramente, Pastor Marcel Balootje
