Remetido: Redactor di Solo di Pueblo, permitimi expresa;
E polis Eric Ras di CURPA tin basta dia ta usa nomber di Dios, pa saca su gal riba gobierno y partidonan den Gobierno, pero pecando contra 10 mandamento di Dios, esta pa no lanta falso testimonio.
Ora lesa su argrumento, por conclui cu sea e ta hopi mal educa of ta hasie’le intencionalmente pa oportunismo politico.
E no por distingui kico ta “crea debe” y “refinancia debe” y kico ta deficit di presupuesto di un pais. Es mas, e no sa at all con pa husga cifranan financiero di pais y tristemente ta bin cu yen ponencia dilanti cu ta mustra un cos: E no tin educacion!
Den su ponencia e ta trece dilanti: “ For di aña 2018 gobierno no a stop di fia. E tempo ey 485 miyon florin, na aña 2019 a fia 270 miyon florin, na 2020 gobierno a kibra e record di 1.5 biyon florin, na 2021 a presta 85 miyon florin, na 2022 a sigui pa fia 185 miyon florin y awo na aña 2023, cu no a yega na su fin ainda, ya a fia 365 miyon florin caba. Pueblo na aña 2027 nos pais tin un debe di mas cu 1 biyon florin ta caduca y ta con lo bay haci?” Un ponencia for di sla, sin ningun base di berdad.
Ta facil pa lansa critica riba Gobierno actual, basa riba odio y mentira, pa purba logra voto den eleccion, pero un mentira hamas por gana un berdad.
Si Gobierno actual a fia na 2020 -900 miyon y na 2021 – 500 miyon, tabata pa paga e propio salario di Eric Ras durante pandemia y ta placa cu a pasa bay directamente pa pueblo. Pues e no por compara e prestamo ey cu esun di AVP, cu a goberna cu deficit grandi pa haci fiesta y paranda. Esun cu critica debe di Pandemia, ta oportunista, pasobra e no ta criticando e partidonan den Gobierno, pero TUR pueblo cu a cobra fase y loonsubsidie pa sobrebibi.
Pues, how low can you go ?
Ta un hecho cu “crea debe” ta resultado di e deficit di e aña presupuestario. Hasi un prestamo nobo pa paga un prestamo bieu no ta crea ningun debe.
Cifranan di deficitnan tey y ta prueba den forma palpabel. Den aña 2022, e deficit di gobierno, saliendo di pandemia a yega 130 miyon, y pa 2023 lo NO tin deficit, sino surplus. Pa prome ves ta resta 60 miyon y cual ta bay pa paga debe.
Di unda Eric Ras ta inventa cu a crea debe den 2023 pa 365 miyon? Ta den su mundo di fantasia, e ta inventa semehante ponencia, y violando tur su leynan di Dios cu tanto e ta gaba, pasobra den 10 mandamento, Dios ta bisa: NO GAÑA!
Hasi un prestamo nobo, pa paga un bieu, no ta crea debe. Si bo fia 1000 florin, pa paga un debe cu a caduca na 1000 florin, na final di cuenta, bo debe a keda igual na 1000 florin.
Loke si ta crea debe ta deficit di presupuesto y na 2023, gobierno a bisa di lo sobra 60 miyon.
Conclucion: Eric Ras ta trece mentira y ey e ta peca contra mandamento di Dios!
