Fraccion di MEP na Hulanda: No a contesta riba HOFA!
Staatssecretaris di Hulanda Eric van der Burg ta un cobarde
Delegacion di Aruba ta almomento na Den Haag Hulanda pa atende reunionnan di IPKO esta Interparlementair Koninkrijksoverleg unda Parlamentonan di Aruba-Curacao-St Maarten y Hulanda ta reuni cu otro riba varios temanan di interes comun. Na final di cada reunion lo firma un lista di acuerdo y palabracionnan hasi conosi como e “afsprakenlijst”.
Un encuentro tras di porta sera cu Eric van der Burg:
Parlamentario Endy Croes di Fraccion di MEP ta considera Eric van der Burg e actual staatsecretaris un Hulandes cobarde y lo splika esaki. Tur reunionnan di IPKO tabata uno publico cual a wordo transmiti enbibo riba plataformanan di Tweede Kamer.
Diasabra ultimo reunionnan a continua desde mainta den Tweede Kamer. Lamentablemente tras di merdia pa ta exacto 330pm ora tabata riba agenda un encuentro cu staatssecretaris Eric van der Burg a cambia e “setting” pa uno informativo mas aun tras di porta sera cual no tabata tin mag di wordo transmiti. Pior ainda Eric van der Burg a bin conta storianan bunita di su bishitanan na Aruba-Corsou-St Maarten y a bin cu un moderador di Eerste Kamer cu un show y preguntanan pre-design pa su persona. Dado momento tanto Tevreden- Rocco Tjon y mi persona a cuminsa lansa preguntanan fuerte riba HOFA cual e no a cay den bon tera y tampoko por a wordo contesta. Alabes Eric a pidi pa Aruba “stop” di hasi Americanonan rico cu e interesnan cu Aruba ta paga na merca. Mesora nos a wordo pidi pa e moderador pa no hasi pregunta mas riba HOFA como cu e seccion ey ta uno informativo y no un debate mucho menos riba HOFA. E sala den su totalidad a keda babuca.
Parlamentario Endy Croes a pidi Hulanda pa mira nan mes den spiel:
Croes a baha fuerte riba staatsecretaris Eric van der Burg puntrando con por ta posibel cu Eric ta keda bisa cada ves cu nos ta “vier gelijke zusters” pero ta trata Aruba diferente. Kiko Eric ta pensa cu Hulanda den pandemia a duna Aruba un strafrente di 6.9% na interes mientras cu Corsou y St Maarten a wordo bendiciona cu interesnan mucho mas abou.
Kiko Eric por contesta alrespecto cu pa Corsou y St Maarten Hulanda a paga (1.8 miljard Euro) 4 mil miyon florin di nan debe di pais pa nan a acepta Rijkswet mientras ta pusha Aruba den Rijkswet sin “come across” cu nada.
Croes a bisa tambe den sala cu Aruba no ta pidiendo tampoco pa Hulanda paga su debe, nos ta orguyoso y nos mes ta paga nos debe pero si kier un trato igual riba e interes mas abou sin cu esaki mester ta den un bachi di Rijskwet.
Mesora a puntra e mandatario con por ta posibel cu Hulanda ta dunando tur aña 6.2 miljard Euro na ontwikkelingshulp na pais nan pafor di Reino como gift (cadeau).
Con por ta posibel cu Hulanda a aporta cu 18 miljard Euro den fondonan di EU di cual e plaka aki a bay como “covid gift” (regaldo) pa entre otro Italia-Spanja-Francia sin ningun condicion.
Croes a termina puntrando Eric dicon Aruba mester wordo trata asina.
Eric van der Burg No a contesta ningun pregunta y a sigui mesora riba otro topico.
Pesey Parlamentario Endy Croes di fraccion di MEP ta considera staatssecretaris Eric van der Burg como un Hulandes hopi cobarde. Esaki realmente ta e trato igual cu Eric van der Burg constantemente ta menciona cu nos ta trata otro manera “vier gelijke zusters”? Mi ta laga e contesta habri pa pueblo mes yena esaki!
