Dialuna ultimo, partido Movimento Electoral di Pueblo (MEP), a lansa un candidato nobo cu lo representa partido den eleccion 2024, dia 6 di december proximo. Lider di partido Evelyn Wever-Croes a indica cu dia 18 di october, cu ta e dia pa entrega e lista final, MEP lo presenta un lista di 29 candidato cu ta capacita y prepara pa guia nos dushi isla.
Riba e anochi special aki, den compania di su famia y fiel votadornan, partido MEP tabata tin e honor di publicamente presenta señor Erwin Wino Lopez como candidato nobo riba e lista di MEP. Lider di partido a indica di ta sumamente contento cu Wino a acepta di subi lista mirando su experiencia amplio, amor y pasion pa loke ta enseñansa y Aruba en general.
Wino, maestro di scol, na su turno cu hopi emocion a expresa cu su deseo semper tabata pa subi lista di partido MEP. El a gradici Lider di partido pa acept’e den e famia di MEP, y a priminti di haci tur loke ta na su alcanse pa logra mas voto posibel den e siguiente eleccion.
Partido MEP ta duna Wino un cordial bon bini na e famia grandi aki, y ta sigur cu e lo duna un contribucion grandi pa hiba partido y Aruba padilanti. Wino ta un candidato nobo cu lo representa San Nicolas specialmente na unda a traves di su trabou como maestro, el a yuda forma hopi ciudadano di nos pais.
