Naci y crece na Aruba, Eldrick “DJ Nutzbeatz” Boekhoudt ta un DJ local conoci pa su energia, creatividad y espiritu di comunidad. Ora e no ta tras di su turntables, e ta gusta core, hasi drag race, hunga y cushina pafo.
E mes ta bibando cu diabetes pa cinco aña y pa e motibo aki, Eldrick ta compronde hopi bon con importante e ta pa crea conscienticacion y motiva otro pa keda activo. “E causa aki ta cerca di mi curason,” e ta conta. “Cu e mentalidad corecto, bo por sigui biba un bida pleno y haci loke bo stima.”
E aña aki, Botica di Servicio ta honra Eldrick cu BIB #1 — como reconocemento pa su aventura inspirado, su actitud positivo y su esfuerso continuo pa promove salud y bienestar riba e isla.
Segun Eldrick, e Diabetes Run & Walk ta uni hende di un manera impactante. “E ta inspira famia y amigo pa move, keda consciente y cuida pa nan salud,” Eldrick ta bisa.
Mas aya di e dia di e evento, e ta curasha comunidad pa sigui crea conscienticacion y duna apoyo na otro. “Cada accion chikito, manera keda activo, come saludabel y duna sosten, por hasi un gran diferencia pa un Aruba mas fuerte y mas saludabel.”
E di 8 edicion di Diabetes Run & Walk lo tuma luga diadomingo 16 di november 2025, organisa pa Botica di Servicio den colaboracion cu CMB N.V., Punta Brabo Diagnostics y Subway.
