Faltando un poco mas di dos siman prome cu e inicio di Mundial 2026, a inaugura diahuebs aki un estatua di gran tamaño di e astro Brasilero Edson Arantes do Nascimento ‘Pele’ dilanti di Estadio Jalisco na Guadalajara, e mesun luga caminda el a hunga den e Copa di Mundo di 1970.
E obra ta mustra e cara di e futbolista cu a bira campeon mundial tres biaha. E ta situa riba un plasa chikito cu a traha banda di e Estadio Jalisco, e luga caminda e ‘Rey Pele’ a hunga e partidonan di e fase eliminatorio, e cuartonan di final y e semifinal di Mundial di 1970, caminda Brasil a corona su mes campeon.
E artista Mexicano Alejandro Velasco a splica cu e estatua tin un largura di casi 10 meter, hunto cu e base cu ta simula e silueta di e Copa ‘Jules Rimet’, e trofeo cu Brasil a keda cu ne despues di a gana un Mundial pa di tres biaha.
Velasco a destaca cu e piesa aki lo ta un legado cultural cu lo recorda e paso di e astro di futbol cu a fayece na aña 2022, y e lasonan fuerte cu e seleccion di Brasil a crea cu e ciudad di Guadalajara.
“Nos a haci un estudio di e tamaño, duna e proporcion di e plasa, pa asina e por ta un estatua cu berdadero peso cultural pa tur e habitantenan di Jalisco,” el a expresa.
A bautisa e obra aki cu e nomber di ‘La Canarinha’, e apodo cu ta identifica e seleccion Brasilero, pasobra no tabata posibel pa uza e nomber di e futbolista historico pa motibo di e derechonan di marca cu ta pertenece na NR Sports, e compania di e famia di e hungado Neymar Jr.
E gobernador di Jalisco, Pablo Lemus, a sigura cu e espacio aki lo sirbi pa atrae e propio habitantenan di Guadalajara, pero tambe lo ta un atraccion turistico pa e personanan cu lo bishita e ciudad pa presencia un di e cuater partidonan cu lo hunga den Estadio Guadalajara.
Pele a cultiva un laso deportivo y personal hopi special cu Guadalajara, ciudad cu a duna un bonbini caluroso na e hungado y na e ekipo di Brasil durante dos mundial. E ‘Rey’ a bolbe na aña 1975 pa un torneo cuadrangular entre ekiponan local, riba invitacion di su amigo Nei Blanco de Oliveira.
Despues, na aña 1976, e brasilero a haci un gira promocional pa un marca di refresco, y el a probecha e oportunidad pa bishita e ciudad, duna cursonan cortico di futbol y comparti cu su fanaticonan.
A pone e estatua di Pele dilanti di e iconico Plasa Brasil, cual a wordo inaugura den pasado na honor di e relacion cu e pais ey a forma cu e ciudad, y cu ya caba tin un piesa di brons cu ta representa dos hungado y un portero, fuera di un plakaat conmemorativo.
