Den presencia di sra. Mervin Wyatt-Ras, Minister di Asuntonan Social, Salud Publico, Cuido di Adulto Mayor y Adicto, tambe Hunta di supervision di HOH, Hunta di Directiva di HOH, representante di IMSAN, famianan y amigonan orguyoso, HOH Academy a celebra e graduacion di 29 profesional den cuido. E anochi tabata yena di emocion y orguyo, destacando e crecemento di profesionalnan den cuido na Aruba y alabes e papel importante cu HOH-Academy tin den formacion di nos profesionalnan den cuido.
Elogio
E anochi a habri cu palabra di orguyo y satisfaccion di Lenie Denteneer, Manager HOH-Academy cu a brinda elogio na cada graduado y tambe e team di HOH-Academy cu ta guia e graduadonan pa asina cada uno logra nan meta.
Gregory Coeze, miembro di Hunta di Directiva a expresa: “mi tin un gran aprecio pa cada graduado paso boso ta contribui directamente na e futuro di cuido na Aruba. Boso profesionalismo ta haci nos sistema di cuido mas fuerte, mas humano y mas resiliente. Aruba por ta orguyuso di boso.”
Graduadonan
Diferente estudio, pero cada uno enfoca riba un solo meta cu ta brinda cuido di calidad specialisa cu ta safe pa comunidad di Aruba. E 29 graduadonan, di cual tres di nan ta coleganan di ImSan, a gradua den e siguiente specialisacionnan cu ta operatieassistent, anesthesiemedewerker, dialyseverpleegkundige, oncologieverpleegkundige, intensive care verpleegkundige, sedatie-praktijkspecialist, vaattoegangverpleegkundige, SEH-verpleegkundige, deskundige infectiepreventie y post-HBO echografie abdomen specialist. Nan formacion ta contribui directamente na departamento di emergencia, cuido cronico, cuido compleho y tambe prevencion na nos isla.
Gratitud
E diploma aki ta tambe ta di esnan cu ta mantene cada studiante enfoca durante e trayecto. Pues un danki ta bay na cada miembro di famia y tambe colega cu a sostene e graduadonan durante nan trayecto. Tambe palabra di gratitud na e docentenan cu a guia e studiantenan te na e meta final. Estudionan den ramo di cuido ta rekeri dedicacion, disciplina y hopi apoyo pues pabien cu boso gran logro!
Un pabien di curason ta bay na cada graduado di parti di Hunta di Directiva di HOH, management y staf completo cu ta super orguyoso di cada uno di boso. Sigui semper t’ey pa nos pashentnan y comunidad di Aruba!
FIN
