Lider di fraccion di MEP despues di reunion den Parlamento dialuna ultimo a declara “Ami ta para pa loke ami y mi gobierno a traha, pero no loke Hulanda a añadi na ultimo. E gobierno di AVPFuturo a permiti Hulanda añadi, y inclui cosnan cu ni ami ni mi gobierno ni gran parti di comunidad ta di acuerdo. “Afspraak is afspraak” pero loke a wordo añadi, NO tabata afspraak y pesey nos ta contra e ley di reino HOFA.
Ademas a resalta cu Gobierno no ta sigur di kico nan a firma, por ehempel no sa ainda cuanto menos interes nos lo bai paga, y ta apenas awor lo hasi e calculacionnan. Un otro ehempel ta cu tin un exigencia den e rijkswet cu ningun ley cu implicacion financiero por pasa den e parlamento di Aruba, sin aprobacion di Hulanda. Esaki por cierto, segun e profesornan di ley, ta bai contra nos Constitucion. Mirando cu e ministernan no por a splica e embargadura di e articulo aki, a palabra cu lo bai busca conseho huridico.
Locual ta di lamenta ta cu Gobierno no a comparti tur informacion ni documentacion cu Parlamento. Ainda Parlamento ta wardando por ehempel riba un carta di dia 14 augustus 2025. Puntra bo mes, si e gobierno AVPFuturo ta sconde asina tanto informacion, ta cuanto cos mas nan tin scondi
Mirando tur esaki, mi ta subraya, cu awor ta momento pa uni, y busca sosten amplio pa convence gobierno pa no comete erornan den e ley aki cu lo perhudica e ciudadano di nos pais.
“Apesar cu fraccionnan di AVP y Futuro a purba coregi e rumbo ekiboca cu e gobierno di AVP y Futuro ta canando pa cu e rijkswet, mi ta keda positivo, pasobra e mensahe a cuminsa yega. Prome nos a kere cu nos ta nos so, pero awor nos ta 10 parlamentario caba den Parlamento cu ta contra, casi tur sindicatonan tambe ta contra, casi 10 mil firmante ta contra y e mayoria di pueblo tambe. E lucha no ta caba aki, es mas, awor e lo wordo intensiva. E accion di firma ta continua, pasobra ta 1 parlamentario so falta pa bari e HOFA for di mesa. Pesey ami ta considera awe nos ta considera un victoria”, tabata palabranan di Lider di Fraccion di MEP, Evelyn Wever-Croes.
