Dialuna ultimo Presidente di Parlamento a yama un reunion cu minister di finansas. Fraccion di MEP a haci varios peticion pa reunion pa atende tur e crisisnan den nos pais. Crisis di costo di bida, siguridad, enseñansa, salud, transparencia den Parlamento. Pero eseynan no ta wordo yama. E reunion cu ta wordo yama, ta pa trata salario maximo di directornan. Pasobra Minister di Finansas a pidi Parlamento pa expresa su sentimentonan tocante 4 cambio na e ley Landsverordening Normering Topinkomens (LNT).
“Awe mi no kier debati riba hisa salario di directornan, awe mi kier papia con nos ta bay garantisa cuido di nos patientnan na Aruba” lider di fraccion di MEP Evelyn Wever-Croes.
Hospital ta demanda gobierno di Aruba pa un pago di 27 pa 29 miyon, cu lo ta gastonan pa cu cuido na turistanan y personanan indocumenta cu no a paga nan cuenta. Nos kier sa ki dia gobierno ta resolve e crisis aki, y garantisa cuido necesario pa nos patientnan. “Kiko ta e solucion riba termino corto? Pasobra cu gobierno kier investiga, ta su bon derecho, investiga numa. Pero no hunga cu salud ni bida di hende” segun lider di fraccion di MEP Evelyn Wever-Croes
