Dialuna Comite Olimpico Arubano a duna un presentacion na Parlamento di Aruba tocante nan structura, organisacion y prioridadnan strategico. E meta principal di e organisacion ta pa identifica talento deportivo desde trempan y desaroya e talentonan aki di un manera profesional, cu e obhetivo pa logra logronan grandi pa Aruba riba tereno internacional di deporte. Nan a wordo invita pa presidente di comision fiho di Deporte, sra. Shailiny Tromp-Lee.
Durante e presentacion, Secretario General di Comite Olimpico Arubano, Sra. Nicole Hoevertsz, hunto cu su ekipo, a mustra con e organisacion ta traha di un manera structural y profesional pa guia, cuida y sostene deportistanan Arubiano den nan desaroyo deportivo y personal. E presentacion a laga un impresion hopi positivo, caminda e profesionalismo di e ekipo a resalta, hunto cu e enfoque integral riba bienestar, guia, educacion y desaroyo di e deportista.
E trabou cu Comite Olimpico Arubano ta haci ta di gran importancia pa futuro di deporte na Aruba y pa crea oportunidadnan pa hoben talento logra desaroyo na un nivel halto.
“Nos a traha hopi di serca cu COA durante cu mi tabata den gobierno. Mi ta gradici nan un biaha mas pa e cooperacion. Mi ta gradici tambe Sra. Nicole Hoevertsz y su ekipo pa e presentacion inspirado y informativo. Nos ta desea nan hopi exito den nan mision importante pa sigui desaroya deporte Arubiano y representa Aruba cu orguyo riba escenario internacional”, Evelyn Wever-Croes a duna di conoce.
