Recientemente mi a combersa cu sra. Sue-Ann Ras pa mi haña sa mas di e tremendo campaña di Fundacion Zinnia: Supla pa Bida, un proyecto den cual nan ta duna bo un testkit “breathalyzer” pa bo mes supla y detecta e nivel di alcohol den bo sanger. Bo mes por mira si e nivel di alcohol ta demasiado halto, y dicidi e ora pa no stuur. E ta un forma pa pone e responsabilidad di ta un chauffeur responsabel bek den man di bo persona.
E proyecto aki ta cay bou di e famoso proyecto ya pa 10 aña, esta Amigo Didi. E mensahe di maneha bo bida y di otro responsabelmente, uzando e breathalyzer, ta un proyecto di un siguiente nivel y hopi innovativo. Aruba tin mester di esaki.
E campaña Supla Pa Bida ta un movecion cu ta uni pueblo, autoridadnan y lider pa crea un cultura mas sigur pa tur hende, specialmente den e temporada di fiesta cu ta den porta.
Nos tur tin hendenan cu nos ta stima ta warda nos na cas. Ora nos sali di cas, nos tur kier yega bek. Specialmente yegando fin di aña nos ta mira mas y mas accidente causa pa abuso di alcohol. Nos por y nos mester evita esaki.
Prevencion ta esencial y crucial den nos comunidad. Ta un honor pa nos mira cu loke a cuminsa cu un idea di un famia cu a pasa den un dolor inmenso, awor ta haciendo un movecion na nivel nacional pa conscientisacion.
Pabien na e team dinamico di Fundacion Zinnia y hopi exito cu e campaña: Supla Pa Bida
