Diabierna ultimo a tuma luga un reunion publico den Parlamento relaciona cu e Landspakket, e pakete di reforma cu a keda acorda entre gobiernonan di Aruba y Hulanda dia 13 di november 2020.
“Ora mi bisa cu e Parlamento aki no ta funciona, esaki ta un ehempel. Mi a pidi e reunion 8 april 2025, y e reunion a wordo yama 16 april 2026. Siendo cu e tareanan di reforma a wordo publica riba website na juni, september y december aña pasa, cual tabata bon momentonan pa duna un update na Parlamento. Segun Presidente di Parlamento, e no por a yama e reunion pasobra di parti di Minister Gerlien Croes no a sinti cu e tabata cla pa e reunion. Si tempo cu ami tabata minister, lo mi a contesta algo asina, sigur e mesun Gerlien Croes lo a protesta.
Politica ta consistencia, si bo ta contra algo como parlamentario, e ora como minister bo mester ta consistente. Como minister presidente, ami tabata bay Parlamento regularmente pa duna update di e topico aki. Pues mi no ta compronde dicon e gobierno aki tin tanto miedo di duna informacion. Gobierno a faya un biaha mas den duna transparencia den e tema asina importante. Warda 1 aña pa un reunion wordo yama, ta totalmente inaceptable”, lider di Fraccion di MEP a duna di conoce.
Landspakket ta un proyecto di Gabinete Wever-Croes, pa trece reforma riba diferente tereno, pa haci Aruba mas fuerte y resiliente. E terenonan cu a wordo acorda e tempo ey cu Hulanda ta finansas, gasto y efectividad den aparato gubernamental, belasting, labor y area social, economia, cuido y enseñansa. Mester remarca cu e palabracionnan haci den 2020 ainda ta wordo traha riba dje, y ta bon pa mira e continuidad den proyectonan.
“Mi ta gradici tur e empleadonan publico, pa e trabou cu nan a sigui haci, desde di cambio di gobierno, pa logra e reformanan necesario pa haci nos pais mas fuerte y resiliente. Nan a trece hopi informacion padilanti, pa cual mi a recomenda e diferente comisionnan fiho den Parlamento, pa yama reunionnan riba cada tema separa, pa nan por comparti e informacion. Ta hopi importante pa cada parlamentario tin informacion mas detaya posibel di cada trayecto y cada tema. Apesar cu a tarda un aña pa e reunion a wordo yama, mi ta hopi satisfecho di por a tuma nota cu e fundeshi cu nos a laga atras, ta wordo continua”, Evelyn Wever-Croes a duna di conoce.
