Evelyn Wever-Croes; Meta di accion di firma ta pa participa na e consulta a traves di internet cu ta sera 28 september 2025

Den conferencia di Fraccion di MEP dialuna ultimo, lider di Fraccion di MEP Evelyn Wever-Croes a splica cu tin un accion di firma andando, y cu ya a acumula miles di firma.

Sinembargo hopi ta esnan cu ainda no a alcansa di yega pa firma, y riba peticion popular ta habri e posibilidad pa firma e peticion ‘on line’ riba e link aki: openpetition.eu/!nbkks 

Por yega na e link door di google  y click “Firma peticion contra HOFA”.

E parlamentario a splica e meta di e accion di firma, y esey ta pa participa na e consultacion a traves di internet cu Hulanda ta ofrece como procedura cu cada cambio di ley. Sinembargo na Aruba no tin un cultura di consulta via internet, y hopi hende cu kier participa na e consulta via internet, no tin email adres.

Pa e motibo aki, a cuminsa cu e accion di firma, pa e ciudadanonan cu kier participa na e consultacion via internet, por haci’e na un forma mas sensiyo. Nan ta firma e lista, y indica kico ta nan preocupacion of cual ta nan obhecion. Y den nan nomber, nos lo participa na e consulta via internet.

Na e momentonan aki tin miles di firma caba. Hulanda lo sera e consulta via internet dia 28 di september proximo. Hendenan ta pidiendo pa mas tempo, pues probablemente e firmanan cu ta aden caba, lo wordo manda adelanta, y despues lo sigui acumula firma.

Un otro meta di e accion di firma ta cu asina por pone tambe presion na Aruba mes. “E ley di reino HOFA no mester bin Parlamento mas pa wordo debati riba dj’e, ni pa wordo vota riba dj’e. Esey ta tuma luga na Hulanda den nan parlamento. Pero e Parlamento di Aruba tin un cos cu e por haci: para e ley. 

Esey Parlamento di Aruba por haci na cualkier momento. Y cu miles di firma, tur parlamentario lo ta mas cauteloso na momento di pidi pa sigui cu e ley aki. E ley ta kita autoridad di e gobierno y e parlamento di Aruba, pa pase den man di Hulanda, sin tin mester y sin cu Hulanda lo sa di haci un bon trabou di dj’e. 

Ya caba e ley di reino cu Hulanda tin cu Curacao y St. Maarten, Hulanda mes a laga evalu’e, y a resulta cu e ley di reino ey a frena desaroyo socio economico di e paisnan. “Esey sigur nos no kier na Aruba, ademas, no tin mester” lider di fraccion di MEP Evelyn Wever-Croes a finalisa bisando.