Recientemente mi a tin e honor di atende un presentacion di Aruba Sport Unie (ASU), unda e directiva nobo a presenta e trabounan cu nan a implementa desde cu nan a tuma mando na aña 2023. E presentacion a mustra claramente cu ASU ta un organizacion serio, cu vision y cu un compromiso real pa desaroyo di deporte na Aruba.
E aña aki Aruba Sport Unie ta celebra nan di 85 aniversario. Esaki ta un logro impresionante y un momento importante den historia di deporte na Aruba. Pa 85 aña largo, ASU a hunga un rol importante den organisacion, promocion y desaroyo di deporte den nos comunidad.
Mi kier expresa mi sincero agradecimento na e directiva actual pa e trabou cu nan a haci te awor. No ta facil pa maneha un organisacion deportivo, pa sostene federacionnan, pa organisa actividadnan y pa sigui traha pa mehora deporte den un pais chikito manera Aruba. Sinembargo, ASU ta sigui haci esaki cu hopi dedicacion y compromiso.
Durante e reunion cu Parlamento, ASU a expresa cu nan ta hopi contento y ta sinti nan reconoci cu nan a haya e oportunidad pa presenta nan trabou y nan vision na e Parlamento. Nan a expresa nan agradecimento na e presidente di e comision permanente di deporte, Shailiny Tromp-Lee (MEP), pa facilita e reunion aki y pa duna ASU e oportunidad pa wordo scucha na nivel parlamentario.
Mi kier felicita Aruba Sport Unie cu nan 85 aniversario. Un organizacion cu logra 85 aña ta mustra perseverancia, amor pa deporte y compromiso cu comunidad. ASU no ta solamente un organizacion deportivo, pero un institucion cu a contribui hopi na desaroyo di nos hubentud, disciplina, salud y union den Aruba.
Mi ta desea e directiva hopi exito den nan trabou, hopi forsa pa sigui desaroya deporte, y hopi sabiduria pa sigui fortalece federacionnan deportivo na Aruba. Aruba mester organisacionnan manera Aruba Sport Unie, cu ta pensa riba futuro di deporte y riba futuro di nos hubentud. Deporte ta forma caracter, ta uni hende y ta construi un pais mas fuerte.
