Raad van Advies ta un instituto halto di gobierno, cu ta proveë Gobierno di conseho riba cambionan di ley. E consehonan aki ta hopi importante pa Parlamento por haci su trabou. P’esey mes, ora un ley drenta parlamento cu tin un “dictum” 4 of 5 di Raad van Advies, pues RvA ta haya e proyecto di ley hopi malo, esey ta un señal di alarma pa Parlamento. Parlamento mester sa e ora cu cada parlamentario mester haci un trabou hopi mas profundo, compara cu si Raad van Advies a duna un dictum 1 of 2 of 3.
Na momento cu Raad van Aruba duna un proyecto di ley un diepe onvoldoende – manera ta e caso cu e ley di Landsverordening Instelling Ministeries (LIM) cu a drenta siman pasa – de facto RvA ta bisa gobierno, no manda e ley Parlamento sin cu haci cambionan grandi. Y ta na Parlamento e ora pa controla si gobierno a haci esey si of no. Y hustamente p’esey cada parlamentario mester tabata mas alerta ora e ley ey a drenta, y en bes di forsa pa ningun parlamentario haci pregunta, manera e presidente di Parlamento Muzanin Wever a haci siman pasa. De facto hustamente e ora ta TUR parlamentario mester a haci pregunta.
Despues cu fraccion di MEP a entrega keho, e presidente di parlamento interino a realisa su eror y a duna nos 24 ora pa haci pregunta. Pa un ley di RvA a duna dictumn 4, cu si ta un examen, e cifra lo tabata 2.5! Nos fraccion a protesta e dictadura den e parlamento aki, strobando nos di haci nos trabou, y ta realmente un berguensa con fraccionnan di AVP Futuro y PPA ta presta nan mes pa cosnan asina. Si Parlamento realmente ta respeta e consehonan di Raad van Advies, e ora parlamentarionan mester haci nan trabou tambe manera mester ta, y tene cuenta cu e consehonan di Raad van Advies. “Mi ta lamenta cu Parlamento no ta tuma e consehonan aki na serio” Parlamentario Evelyn Wever-Croes a expresa.
