Siman pasa diaranson, e lidernan di fraccion y presidente di Parlamento a reuni cu Premier Hulandes Rob Jetten na VNO.
‘Como lider di MEP pami tabata importante pa informa e premier di Hulanda cu nos ta contra e ley di reino ‘Hofa’, pasobra e ta mina nos autonomia, e ta contra nos constitucion, e ta contra e palabracionnan cu ami a haci cu Hulanda na 2024, y principalmente, pasobra e no ta necesario. Y mi a cuminsa nos reunion cu e statement ey.
Di su banda el’a duna di conoce cu e ta na altura di nos posicion, pasobra desde Hulanda nan ta volg tur e desaroyonan riba e tema aki, y el’a urgi Parlamento pa debati riba e tema y tuma un posicion. Parlamento no por sigui alarga e discusion aki mucho mas.
Gobierno Hulandes ta en espera di e conseho di Raad van State, cu lo ta cla mas o menos medio juni, y a base di e conseho ey nan lo dicidi SI ta continua y CON ta continua cu e ley di Reino. Esaki ta dunami speransa cu Hulanda ta habri pa considera e consehonan di Raad van State.
Mi ta contento cu mi a haya e oportunidad di expresa e preocupacion cu ta biba den miles di persona riba nos isla, y mi ta contento tambe cu e premier a duna importancia na esaki.
Mi ta considera Premier Rob Jetten un amigo di Aruba. Hunto nos a organisa e prome conferencia di energia pa Caribe na 2023, y e ta esun cu a anuncia e fondo di crecemento pa yuda nos pais transiciona pa energia mas limpi, e fondo di 54 miyon euro cu ex Premier Dick Schoof tambe a referi na dj’e na november aña pasa.
“E lucha contra HOFA ta continua, esnan cu ta desea di firma contra HOFA ainda por hasi’e. Mi ta spera cu Presidente di Parlamento yama e reunion cu nos a pidi desde maart 2026 pa caba, pa asina Parlamento di Aruba por fiha un posicion” lider di MEP, Evelyn Wever-Croes a duna di conoce.
