Dialuna durante e reunion di Parlamento, Sra. Evelyn Wever-Croes a expresa su profundo preocupacion tocante e situacion alarmante rond di e planta di purificacion di awa na Bubali. Den su presentacion, el a enfatisa cu e instalacion actual a wordo construi pa un Aruba di pasado, y cu nunca a wordo adapta na e crecimiento significativo di poblacion ni e presion di mas cu un miyon turista pa aña. Esaki a resulta den tres problema critico: molester di mal holor den e area di hotelnan, contaminacion di lama cu awa di mal calidad, y un riesgo real cu henter e sistema por haya un colapso total.
Evelyn Wever-Croes a trece padilanti cu desde 2017, su gobierno a traha consistentemente riba solucionnan, asignando miyones pa reparacionnan urgente mientras un plan integral tabata wordo desaroya. Den 2022, un inversion di 16 miyon florin a wordo inclui den presupuesto di pais Aruba, pero pa motibo di presion di CAFT, e fondo no a por wordo manteni. Esey a pone cu Gabinete Wever-Croes 2 a tuma un decision dificil pero necesario pa privatisa e planta, creando Aruba Wastewater Sustainable Solution (AWSS) den juni 2024, cu aprobacion di mayoria parlamentario y den tur transparencia cu Parlamento.
Pa garantisa financiamiento, a introduci un entry fee di 20 dollar pa turista. Segun Wever-Croes, AWSS a actua cu rapidez, contratando expertonan internacional y trahando riba financiamiento pa solucionnan sostenibel. Paralelamente, 10 miyon a wordo inverti den un solucion di corto plazo pa reduci e problema di mal holo y contaminacion inmediato di lama.
Sin embargo, Wever-Croes tabata tin critica fuerte riba e decision di e gobierno actual, cu a asumi poder na maart 2025, pa pone tur e plannan un banda sin presenta un alternativa concreto. E planta a pasa di un situacion dificil pero bou control, pa un crisis awor sin direccion, segun Wever-Croes. El a señala cu debi na e falta di vision y liderasgo, e problema di mal holo a empeora, e calidad di awa a bira pio, y e riesgo di un desastre na e planta nunca tabata asina grandi.
Tambe, el a expresa preocupacion serio di stakeholders, kende anteriormente tabata confia den e direccion escogi, pero cu awe ta profundamente decepciona y preocupa cu e falta di accion.
Wever-Croes a conclui cu e falta di un plan concreto ta muestra di un gobierno sin vision, sin liderazgo y sin sentido di urgencia.
Evelyn Wever-Croes a urgi e gobierno pa laga politica infantil un banda y presenta un plan concreto pa atende e crisis na Bubaliplas, proteha nos medio ambiente y salvaguardia nos economia.
“Aruba mester liderazgo. Aruba mester accion. Aruba no por permiti un bashi di gobernacion.” Evelyn Wever-Croes a termina bisando.
