Parlamento a reuni e siman aki riba oportunidadnan petrolero pa Aruba.
Fraccion di MEP a pidi e reunion cu urgencia, 3 luna pasa. MEP ta lamenta cu a tarda asina tanto tempo pa yama e reunion. Fraccion di MEP kier a subraya cu Aruba merece pa sikiera explora e posibilidadnan di industria petrolero desde cambionan na Venezuela.
Despues di hopi insistencia, Minister Dowers a declara cu e lo bay explora e posibilidadnan, pero e no tin un plan ainda. E actitud pasivo di e minister keto bay ta un motibo di preocupacion pa e fraccion di MEP. Pa e motibo ey e fraccion a presenta un mocion pa den 8 siman bin cu un plan di accion detaya, con Aruba ta bay explora e posibilidadnan.
“Ami ta un di esnan cu tabata pensa cu refineria ta ‘gepasseerd station’ pa Aruba pasobra nos a haci hopi esfuerso pa habri e refineria, pero no tabata tin ningun perspectiva. Sinembargo despues di 3 januari, mi ta mira cu e cambio ta trece hopi oportunidadnan nobo pa Aruba. Y tanten ta un refineria cu ta cumpli cu standardnan di medio ambiente, cu ta crea cuponan di trabou pa nos hendenan, y ta crea desaroyo economico sano pa Aruba y specialmente pa San Nicolas, mi ta di opinion cu nos mester at least purba. “We owe it to the people of Aruba” pa wak si tin oportunidad.
Nunca antes, prome cu 3 jan, tabata tin e oportunidadnan aki door di 2 problema. E prome ta e sanccionnan di Merca contra Venezuela, y e di dos tabata e contract di Citgo. Citgo no por a inverti y p’esey no por a habri e refineria bek. E motibo cu nan no por a inverti tabata e sanccionnan di Merca contra Venezuela y contra Citgo. Y nan a haci apelacion riba esey como motibo cu nan no por a inverti. Esey tabata e motibo tambe cu no por a cobra Citgo e $ 350 miyon, pasobra den e contract entre AVP y Citgo nan a inclui un articulo cu si tin sanccion di Merca, no por cobra nan $350 miyon.
Awor tin oportunidadnan nobo, y nos ta spera cu pronto Aruba por mira e desaroyo aki.
