Durante reunion den Parlamento, Parlamentario Evelyn Wever-Croes a splica kico en realidad tin den e ley di reino HOFA cu ta malo y con e ta perhudica cada ciudadano di pais Aruba. E “Rijkswet Hofa” ku tin riba mesa awor, no ta refleha e acuerdo ku Gabinete Wever-Croes a logra na 2024. Es mas, e ta contrario na e promesanan cu a wordo haci.
E rijkswet aki lo frena Aruba su crecemento economico
Aruba ta saliendo di un periodo dificil, enbes di duna espacio pa crea mihor cuponan di trabou, pa inova, pa lanta nos economia, e ley aki ta pone mas regla, mas control y mas burocracia, kitando e confiansa cu mester pa crece nos economia.
Tin articulo den e ley cu ta viola e Statuut, e documento cu ta base di nos relacion den Reino
Den e Statuut ta para bon cla cu Aruba ta un pais autonomo den Reino. Pero e ley aki ta kita nos derechonan basico pa dicidi riba nos propio finansa, nos propio futuro. Si nos mes viola e Statuut, ta ki señal nos mes ta manda? Ta pa Hulanda trapa full e Statuut e ora.
E ley aki ta mina nos autonomia.
E leyta pone poder den man di un organo cu ta domina pa Hulanda y cu por dicidi riba cosnan manera;
– Subi tarifa di impuesto manera un BTW mas halto of belasting riba tips;
– baha gastonan, manera gastonan di salario di maestronan.
Esey ta afecta abo directamente den bo cartera, hustamente den un momento cu costo di bida a subi drasticamente, y e gobierno actual no ta haci nada pa alivia e dolor di pueblo pa baha e costo di bida.
E “exitbepaling” cu ta den e ley actual ta irrealistico.
Aruba lo mester cumpli cu 20 condicion, pa por sali afo, y esaki no ta loke a wordo palabra den e Bestuurlijk Akkoord. Es mas, e 20 puntonan aki ta parti di e “Landspakket” pa cual a keda palabra cu Hulanda, cu nan NO ta bin den un ley di reino, sino den e Onderlinge Regeling cu nos a logra na 2023. Pero awor, via porta di cushina ta ancra nan den un rijkswet. Afsrpaak is afspraak? Wel, esaki no tbt e afspraak di 2024. Esaki ta haci cu e ley cu supuestamente ta “temporal” en realidad ta bira permanente, manera e profesornan di ley a adverti. Por cierto, riba e punto aki tampoco e ministernan a duna reaccion.
E forma con Hulanda ta exigi pago bek, no ta combini Aruba.
E forma con lo exigi pago lo hinca Aruba den mas problema, pasobra pa cumpli cu Hulanda, Aruba lo keda sin cashflow, sin placa, y hasta Aruba mester bai haci debe pa paga Hulanda bek. E 4 ultimo puntonan aki ta contra e Bestuurlijk Akkoord di 2024. Afspraak is afspraak? Wel e dos gobiernonan di Aruba y di Hulanda no a tene nan palabra.
