Diahuebs 12 di juni 2025, lo tuma luga un evento solem na Wilhelmina Park pa honra e balentia di Annelies Marie Frank, miho conoci como Anne Frank, cu a nace dia 12 di juni 1929 na Alemania y cu a bira un simbolo universal di e Holocaust.
E ceremonia lo tuma luga na e estatua di Anne Frank di 6:30 pa 7:30 di atardi, y ta dedica na conmemora e victimanan di Segunda Guera Mundial y pa rindi homenahe na e espirito di speransa y resistencia cu Anne Frank a representa.
Ta exactamente 14 aña pasa cu Gobierno di Aruba a inaugura e estatua na Wilhelmina Park riba e fecha natal di Anne Frank. Durante e ceremonia original, a devela e estatua den presencia di Marthur Luther King III y ex-Director di Anne Frank House, Dr. Hans Westra.
Gobierno di Aruba y Comision Celebracion Dianan Nacional CCDN, ta invita comunidad di Aruba pa asisti na e ceremonia solem y refleha riba e lesnan historico cu Anne Frank a laga atras pa mundo.
Tocante Anne Frank
Annelies Marie Frank, miho conoci como Anne Frank, a nace dia 12 di juni 1929 na Alemania. E tawata un mucha muhe di origen hudiu, cu a bira un simbolo di e Holocausto.
Na aña 1939, e mama di Anne a traslada pa Hulanda cu su dos yiunan, pa hui di e persecucion Nazi.
Dia 12 di juni 1942, Anne a haci 13 aña, y a ricibi un diario como regalo. E diario tawata captura su pensamento, su temor y speransa den e temporada ey. For di 6 di juli 1942, e famia Frank a muda pa e parti patras di nan empresa. Durante e tempo aki, Anne a pasa mayoria di su tempo ta lesa, studia y skirbi den su diario. Anne a skirbi te 1 di augustus 1944.
E famia di Anne a wordo aresta dia 4 di augustus 1944 pa e Grüne Polizei. Nan a clasifica e famia y otro conorcirnan como criminalnan y nan a wordo manda di Westerbork pa e campo di concentracion di Auschwitz.
Dia 28 di oktober 1944, nan a traslada Anne pa Bergen-Belsen. Eynan Anne a fayece den luna di februari 1945, pa motibo di e epidemia di tifus.
Miep Gies y Bep Voskuijl, dos persona cu tawata protectornan di e famia Frank, a haya e diario cu algun papel mas di Anne. Na aña 1947, e tata di Anne a publica e buki cu titulo: E cas di patras “Het Achterhuis”. Anne Frank a skirbi frasenan manera:
A pesar di tur cos, mi ta sigui pensa cu e ser humano ta bon
Esun cu ta feliz, ta haci e otronan feliz tambe
Mi no ta pensa den tur e desgracia, sino den e beyesa cu ainda ta keda
Su historia ta un recordatorio poderoso di e horrornan di e Holocausto y e resiliencia di e spirito humano.
