Oranjestad – Informacion cu a yega na mesa di redaccion di Solo Di Pueblo ta confirma cu gobierno di AVP-Futuro a nombra Michael Henríquez como director nobo di Serlimar, un compania estatal importante, sin ningun proceso di solicitacion habri. Henriquez ta ex-director di ATIA y ex-consehero di e mes Mike Eman na 2017, segun por recorda, tabata gana un salario di casi 25 mil florin pa luna den su ultimo puesto, sin nunca a skirbi un conseho. E nombramento aki ta contradici completamente loke cu AVP y Futuro mes a firma den nan acuerdo di gobernacion 2025-2028. Den esaki, nan a promete:
“introduci perfil di funcion, proceso transparente di solicitud y nombramento di director y comisario.”
“Nombra director y comisario basa riba profesionalismo, educacion, experiencia y imparcialidad…”
Pero kico nos ta wak awor? Un nombramento na un puesto crucial, sin solicitacion habri, sin consulta publico, sin un reporte medico, sin evidencia di merito of capacidad pa maneha un compania estatal di e tamaño y importancia di Selimar.
Di promesanan cu lo ta un proceso habri, husto y profesional, no a keda nada. Nan ta nombra amigonan di partido, nombramento cu ta bai contra tur e compromiso cu a haci cu pueblo. E nombramento di Henriquez ta un otro parachute claro, cu ta minando e credibilidad di e gobierno AVP-Futuro.
