Oranjestad – Otro golpi na e confianza e promesa di bon gobernacion di gobierno AVP-Futuro. Un carta cu a leak a revela cu Robert Henríquez, ex-director di Elmar, a wordo nombra como algemeen directeur di Refineria di Aruba N.V. (RDA). E nombramento lo tuma efecto for di 1 di juli 2025.
Segun e carta cu ta firma pa A.L. Dowers na nomber di Utilities Aruba N.V., e decision a tuma lugar durante un “buitengewone algemene vergadering van aandeelhouders” (asamblea extraordinario di accionistanan) dia 18 di juni 2025. Henriquez a wordo invita pa confirma su acuerdo pa medio di firma di un copia di e carta, cual el’a firma tambe “voor akkoord”
E informacion cu a yega na Solo Di Pueblo ta crea mas duda riba e compromiso di gobierno cu transparencia y bon gobernacion. Den e acuerdo di gobernacion AVP-Futuro 2025-2028, bao capitulo di finansas publico, seccion “companinan estatal”, a wordo priminti: “Introduci perfil di funcion, proceso transparente di solicitud y nombramento di director y comisario.” “Nombra director y comisario basa riba profesionalismo, educacion, experiencia y imparcialidad…”
Pero de hecho nos ta wak otro nombramento secreto, sin proceso habri, sin solicitacion pa pueblo por participa, y sin un evaluacion publico riba capacidad of merito di e candidato. Tampoco nos ta recorda e motibonan di su desenlace cu Elmar. Nos lo sigui cu e wowo critico riba tur nombramento y accion di gobierno. Pueblo merese claridad y respet.
Pa no laga espacio pa duda, aki nos ta publica e carta, cu a circula riba whatsapp.
