Durante su presentacion den Parlamento di Aruba, e Minister di Husticia Rocco Tjon a revela cu su ministerio tin plania 22 proyecto vital pa e aña 2024.
Un di e proyecto destaca ta e renobacion di e ex hulpbestuurskantoor na Savaneta. E sitio aki lo keda e sede di e “Operation Command Center,” cual lo bira e centro avanza di monitoreo pa tur camera di seguridad na Aruba, y tambe pa e señal di radar. E idea ta pa establece un kamber di control central, caminda nan por sigui tur evento den tempo real, garantizando un contesta eficiente na situacionnan di emergensia.
E centro di monitoreo lo integra tecnologia moderno pa analisa imagenan di camaranan di seguridad, ekipa cu sistemanan avanza di deteccion y sigui e obhetivo. Esaki ta mehora e bista riba area grandi y ta indentidica actividadnan sospechoso.
Cu e implementacion di un radar nobo cu ta forma parti di e sistema, e Centro di Monitoreo lo tin e capasidad pa sigui no solamente e area riba tera, sino tambe e area maritimo pa reforsando asina e seguridad riba tur frontera di Aruba.
E paso aki ta representa un impulso significativo pa modernisa y optimisa e infrastructura di seguridad, garantizando asina un ambiente mas sigur pa e conunidad di Aruba.
Alaves lo renoba tambe ex warda di polis na Savaneta y aki lo acomoda un otro departamento di polis.
Pues ta trata di dos proyecto pa Savaneta cu lo mira lus den 2024.
