SV Estrella Futbol ta anuncia cu ex-hungador Theodoro Werleman miho conosi como Doy Werleman a bay laga nos. Doy fuera di tabata un ex-hungador di Estrella, ta tambe primo di presidente Sr. Denchi Werleman y omo di Sr. Edgard Vrolijk cu ta miembro activo di Estrella Futbol team.
DOY WERLEMAN
Doy a hunga den Hoofdklasse pa Estrella for di 1962 te cu 1971, en total 9 campeonato. Doy tawata un hungador estelar cu mayoria di biaha a funciona como rechtsbuiten (alero derecho). Doy a yuda Estrella bira un biaha campeon di Aruba, e campeonato 1968/69 y cuatro biaha subcampeon 1965/66, 1967/68, 1969/70 y 1970/71.
Doy a hunga den cuatro Copa Antiyano pa Estrella cu a bira campeon na 1970 y dos biaha subcampeon, na 1968 y 1969.
Na 1967 Doy tambe a forma parti di e seleccion di Antiyas cu a hunga na Jamaica weganan di cualificacion pa e campeonato di Concacaf.
Doy tawata un hungador ehemplar cu semper a comporta su mes deportivamente riba tereno.
Acto di entiero lo tuma lugar Diasabra 6 di maart 2021 na Misa Inmaculada Concepcion, Santa Cruz di 9’or pa 11’or di mainta.
Dia di condolencia lo tuma luga na Aurora Funeral Home, Diabierna 5 di maart 2021 di 7’or pa 9’or di anochi.
Directiva y famia completo di Estrella ta manda nos mas sincero condolencia pa famia y cu Doy descansa na paz ?
