Manera ya conoci, e parlamentario di AVP, Benny Sevinger a wordo haya sospechoso di 5 acto criminal. Asina mes, Partido AVP a permiti pa e participa den e ultimo eleccion mientras e tawata den KIA y awo e ta un parlamentario poniendo asina no pais su cara na berguensa no solamente na Aruba sino internacionalmente.
Ministerio publico ta haya señor Sevinger culpable di 5 acto criminal. Abo sa cua nan ta?
Falsificacion = traha documento falso, cambia fecha, etc.
Estafa = gaña hende cu e meta di saca placa for di nan, na hulandes ‘oplichting’
Tumamento di regalo of promesa = haya placa bou mesa, of un otro fabor
Labamento di placa = haya placa di soborno (cu ta ilegal, y pues bo no por uze’), y purba legalisa esaki bou un pago legal pa bo por uze
Abuso di su funcion = uza su funcion como minister pa pone otro hende haci algo ilegal, y duna instruccion na departamentonan pa haci algo ilegal
Den tratamento di e caso, Ministerio Publico lo expone kico ta loke Benny a haci pa conduci na e cargonan aki, cu ta hopi hopi pisa.
Señor Sevinger ta bay wordo huzga pa 5 acto criminal mas pisa. Na juni hues lo fiha e fecha di tratamento di e caso di Benny Sevinger.
Mientras tanto siman pasa den Parlamento, Fraccion di MEP, sosteni door di Fraccion di RAIZ a presenta un mocion di Integridad pa salbaguardia e cara di Parlamento. Un mocion pa asegura cu ningun politico corupto of cu ta sospecha di ta corupto por bira parlamentario y pone nos cara na berguensa manera awo ta e caso di señor Sevinger. E mocion aki no a conta cu e sosten di politiconan di AVP, MAS y Accion21, mustrando asina na ki banda nan ta para ora ta trata integridad. Tur e politiconan di oposicion a vota contra e mocion di integridad aki brasando asina tambe corupcion un biaha mas.
