Ex minister di AVP, Sr. Paul Croes a entrega su mes na Kia diamars mainta pa 9.or. Esaki el’a anuncia via di su facebook, bisando cu e ta cumpli cu su responsabilidad pa drenta paden un rato. Tabata dia 9 di Febuari cu corte di casacion a reconfirma e veredicto di hof unda ta duna Paul 3 aña di casstigo. Hof a baha e sentencia cu 1 aña, cual inicialmente tabata 4 aña den corte di prome instancia.
E castigo pa ex minister di AVP ta varios acusacion di fraude, corupcion, soborno, etc.etc. unda tabata pidi y tuma placa pa duna permiso pa trahadornan stranhero. Como cu a firma pa hopi trahador stranhero, esaki a stroba Arubianonan pa haya trabao, segun e rekistorio di fiscal.
E caso mes tin basta aña andando. El’a cuminza na 2015 ora cu Prensa y entre otro Solo di Pueblo a cuminza bati alarma di cosnan irregular cu ta sosode. Despues un secretaria di Paul mes a traha un carta pa expone kico ta pasando, cual carta a wordo entrega na Sra. Nicole Hoeverts kende na su turno a papia cu Paul riba e desaroyo.
Ministerio Publico a cuminza un investigacion unda varios comerciante a cay, como tambe varios trahador di Paul na su oficina. Gran mayoria tabata deal firma di e minister cu comerciantenan pa asina haya ‘positivo’ na DPL. Maske cu DPL tabata nenga hopi permiso, a bira un custumber cu tabata hiba e permisonan na oficina di minister, traha un carta di dispensacion y minister ta firme y overrule DPL. Asina cu minister firma e carta aki, e comerciante por bay direct DIMAS pa reclama e permiso pa trahador stranhero.
Den un schrift cu nan a haya di un tramitador, por a constata cu e tabata hiba adminsitracion di pagonan di cual den su schrift a haya como 90 mil florin cu el’a cobra y den mes un schrift tin pone cuanto e tabata hiba pa e ex minister di AVP.
Mester bisa cu esaki sigur ta un dia historico, pasobra hopi a pensa cu politiconan lo no sinta castigo na Aruba y semper lo get away.
