Mirando cu 17 agosto nos lo bolbe cuminza un anja escolar lo ta bon mi dedica algo na e ocacion special aki y comparti un poco experiencia cu mi yui nan y nieto nan.
Laga mi cuminza conta un anecdota di tempo mi mes a bay scol na Santa Cruz. Un alumno no tabata sali bon cu un meneer di scol y a start un discusion den klas. E mucha a bisa meneer : “ami no a pidi pa bo ta duna mi le. E meneer a conteste:” ami tampoco a pidi pa bo ta den mi klas”. Ta situacion nan cu ta pasa. Al final e educador mester e alumno pa e por eherce su trabou y e alumno mester e meneer pa e por ser educa y prepara den bida pa su majan.E realidad di bida.
Pesey mi kier a desea tur e educador nan hopi dedicacion, pasenshi y tolerancia cu nos mucha nan. Trata nan tur mescos cu ta bo yiu nan tur ta. E alumno tambe mester demonstra respet, disciplina cu e a bin scol pa sinja pa e por educa su mes pa por sigui bay dilanti den bida. E diploma cu al final e mucha logra no ta pa e educador cu ya tin tur su diploma nan, ni pa bo tata cu mama, pero abo cu ainda mester hanja e papel ey!
E ta un medio pa bo por sigui progresa den bida. Garantia si e no ta!!Tur cos despues lo depende di bo esfuerzo, trabou y suerte den bida.
Bo mester di e diploma pa por competi y progresa den bida. Esaki lo bira e cos cu unda bo solicita nan lo puntra bo pe!!Nos como mayor nan tin e responsabilidad pa yuda e mucha nan den e formacion na cas y splica nan cu estudio ta e mehor cos den bida pa tin y cu haci bon uso di e oportunidad aki cu ainda den hopi pais no ta adecuado y bon, manera di nos.Con importante educacion ta mi lo conta un anecdota cu mi mes a pasa aden cu tin mas cu 12 anja tur mainta y merdia ta hiba y busca mi nieto(a) nan na scol.
Un di nan Zander tempo e tabata den 1ste of ta 2e klas tur mainta asina e subi den mi auto e ta puntra mi:”Opa nos ta laat y ami ta contesta:” no nos ta na ora ainda”.
Tempran of laat esey tabata e contesta clasico. Cu tempo e no ta puntra mi mas y e mes ta bisa mi cuantor tin y cu si ta laat si of no. Algo simpel, pero esaki ta balor di educacion. Puntra promer locual bo no sa, pero busca pa bo mes sa!!
Asina nos mucha nan ta keda educa nan mes mas y mas y bay scol nan mas halto den educacion y pa nan formacion. Lamentablemente ketu bay mucho ta cay na caminda, pasobra e “doorstroming”, manera e intencion di e mammoetwet tabata ta cu tur hende lo sigui studia, locual den realidad no ta y cu a fracasa totalmente!! Mucho “drop outs”. No puntra kiko lo tin pa nan majan y unda nan lo end up den bida????
Nos como mayor nan mester duna nos mucha nan tur amor, carinjo y percura pa nan tey na ora na scol y tur dia desea nan tur cos bon na scol y puntra nan ora scol caba ta con e dia a bay ta kiko tin pa haci na huiswerk etc.
E mucha mester ripara cu bo tin interes den dje, bo ta stime y ta dune tur atencion. Haci esaki tur dia. E lo yuda den e formacion di nos mucha nan y bo ta crea den nan amor y respet.Mi ta desea tur e educador nan, mucha nan y nan mayor nan un anja escolar fructifero y exitoso.
Traha duro cu disciplina, respet y dedicacion bo ta yega. Nada lo ta bay facil den bida.Egoismo, celos y materialismo ta cabando cu solidarismo e den mundo mudano, enganjoso aki y e factor “tempo”ta contra nos. Tur hende ta pura y tin hopi cos di haci!!! E mucha nan na bo scol ta bo amigo nan ta den e mesun situacion.
Mucha nan no tenta otro pa cualquier cos cu lo por laga un mucha sinti su mes inferior. No abusa di ningun mucha den grupo y no trata na isola un mucha pa qualquier defecto fysico of otro cos cu e por tin. Nos tur ta mesun yui di Dios. Laga nos no crea compleho di inferioridad na scol caba. Dios ta stima nos tur y nos tur tin derecho di biba un bida trankil y sin ser molestia. Mayor nan y tur esnan cu ta hiba nos mucha nan scol. Hopi pasenshi den trafico y coopera pa nos tur por yega nos destino. Bo no por ta laat y toch kere cu bo ta yega tempran. Ta serca nos e responsabilidad ta pa nos mucha nan ta yega na ora scol, laga nan atras serca e educador nan y despues merdia/ atardi hiba nan atrobe cas. Tur cos bon y hopi
exito pa tur envolvi den ensejansa/educacion. Boso tin un trabou y responsabilidad noble cu casi mi por yame un “ roeping” pa tur cu ta eherce cu amor. Biba conocemento mediante educacion cu tambe ta un inversion grandi y importante den nos majan.Exito pa boso nan tur.
