Ex Promer Minister Nelson Oduber: Esencia di un pais ta su moralidad

Un pueblo mester tin su moral, pasobra ta dor di su moralidad e ta bira grandi. Pa organiza un pais su gobierno/ parlamento ta bin cu ley nan y sanction , unda nos tin derecho y hopi obligacion nan. Gobierno su responsabilidad ta organiza y administra un pais y percura pa tin orden y proteccion pa nos tur. Moralidad no por ser regula pa ley. E ta e ambiente cu bo a lanta na cas sigui na scol y den publico, unda e influencia por ta grandi ariba nos comportacion. Nos a lanta ta coregi otro cu tur bon intencion pa yuda otro. Tin di nos por ta mas debil cu otro y mester ser proteha contra influencia y comportacion nan aheno na lo normal. Ken abo ta ta ser huzga a base di esey. Bo tin derecho di ta kiko cu abo kier ta, pero siempre y cuando bo ta respeta esnan rond di bo cu kier mantene y proteha nan moralidad cu ta ser determina pa nan educacion na cas. Cu hende ta cambiando norma y balor nan tur dia ta un realidad cu nos lo mester sinja biba cu ne, pero esaki no kiermeen si cu nos lo mester tolera tur cos den publico y accepta cos nan cu lo molestia nos consenshi. Nos formacion y comportacion ta ser hopi vez determina pa e bida familiar cu ta ser determina pa e regla nan di e cas cu bo a lanta aden y e bario unda bo ser forma. E ta e grandeza di un pueblo. Scol su influencia ta ariba bo educacion kiko bo lo kier bira den bida. Pa nos por combati pobreza etc. nos mester sigui percura pa un bon sistema di educacion cu ta respeta nos religion y nos moralidad. Locual por ta pa bo por pa hopi otro e ta un molester y nos tur mester respeta e derecho cu otro nan tambe tin. Nos no por keda indeferente ariba locual ta pasa rond di nos y influencia nan aheno cu tur dia ta ser promovi den e medio nan social, pero esey no kiermen si cu nos lo mester regula nan. Ta nan mester adapta nan mes na locual ta nos orden di fatsoen, decencia y moralidad cu nos tin siglo ta biba cu ne. Respeta nos tambe pa nos tambe mester respeta tur cu kier ta otro y kier ta diferente. Bo derecho ta caba unda di mi ta cuminza. Ban purba biba asina nos lo por yega un dia na un mehor mundo. Tin lugar aki na mundo pa nos tur y segun mi nos tur ta yui di Dios. Un contribucion di curazon y personal. No molestia mi wowo cu locual mi no kier waak. Ta mi derecho fundamental di ser respeta mescos ami tin e obligacion di respeta cu bo ta otro!