Den un anochi dramatico cerca di Vader Piet na Aruba, cinco persona, entre nan un mucha muhe di 16 aña visiblemente cu golpi na curpa y na sanger, a yega tera for di un boto kibra. Esaki a sosode pa 11.45 di anochi. Nan a bisa cu den total nan ta 13 riba e boto.
E personanan aki ta consisti di dos hoben homber di 20 pa 25 aña y dos otro homber di 30 pa 35 aña hunto cu e damita di 16. Nan tabata busca desesperadamente yudansa y guia. Segun un testigo ocular, nan a manifesta cu nan ta bayendo Hooiberg.
E situacion a tuma un buelta tragico e siguiente mainta ora cu a descubri dos persona na bida, pero tambe a haña 6 curpa sin bida na den awanan pariba di Vaderpiet.
Esaki ta coincidi cu e informacion di e esnan cu a yega tera mei anochi, kende lo a indica na un testigo cu originalmente nan tabata riba un boto cu un total di 13 persona.
E incertidumbre ta rondona e incidente aki ta laga preguntanan riba e circunstancianan cu a conduci cu e boto a bolter y e condicionnan den cual e personanan a bordo tabata. Autoridadnan local ta haciendo investigacion pa clarifica e detayenan di e tragico suceso aki. Nos lo ta actualizando cu mas informacion mientras cu e ta disponibel.
Cu e declaracion di un testigo ocular, por cera e capitulo, unda 7 a salba y 6 a fayece.
