Dialuna atardi Minister Endy Croes tabata presente na aeropuerto Internacional Reina Beatrix pa desea delegacion di Aruba cu ta sali pa Croatia, City of Požega un bon biahe y hopi exito cu e intercambio cultural.

Cinco hoben lo representa Aruba na Croatia hunto cu representante di CEDE Aruba, sra Elsa Krozendijk. Un total di trintiseis hoben entre edad di diesocho y trinta aña di Aruba, Sint Maarten, Spaña, Rumania y Irlanda ta participando den e “Musical Vox Populi’ cu ta tuma luga for di 27 di juli pa 6 di augustus. 

E intercambio cultural ta un programa di Erasmus Plus coordina pa CEDE Aruba. E obhetivo di e proyecto ta pa e siña, empodera y educa musiconan hoben y asina nan tambe por sigui desaroya nan talento y inspira otro hoben tanto local como internacional. 

Durante e intercambio cultural compositor, areglista, cantante y musico lo trece dilanti e cultura y musica di Aruba. Brindando paisnan cu ta participando e oportunidad pa conoce un poco mas di cultura di Aruba y nos delegacion tambe ta intercambia cu e paisnan. Nos hobennan a bai bon prepara pa cu e intercambio aki y representa Aruba dignamente. Minister Endy Croes ta desea nos talentonan hopi exito den e intercambio cultural.

LEAVE A REPLY

Please enter your comment!
Please enter your name here