Oranjestad – Profesionalnan cu ta traha na bienestar di derecho di mucha den Reino, por mira bek riba un conferencia exitoso. E biaha aki e conferencia a tuma luga di forma digital y tabatin dos tema principal: monitoreo y evaluacion di un banda y e impacto social di COVID-19 riba mucha y hoben di otro banda. Durante e conferencia di hubileo aki Taskforce a mira bek riba e ultimo 5 añanan tambe. Ademas, a haci uzo di e oportunidad pa wak dilanti y mira con Taskforce por crea e cuadronan necesario den futuro, pa tur mucha y hoben den Reino por lanta den un ambiente safe, saludabel y cu amplio oportunidad pa desaroyo.
Den e temporadanan dificil aki, comparti conocemento, crea conexion y colabora cu coleganan den Reino ta keda importante y awor mas cu nunca, mirando, entre otro, e consecuencianan negativo di COVID-19. E temponan di reto aki ta pidi pa pais- y entidadnan publico den Reino uni forsa, pa por combati problemanan relaciona cu derecho di mucha di forma conhunto. Como resultado, muchanan den Reino por mantene perspectiva riba un futuro saludabel y safe, un futuro den cua bos di nos mucha- y hobennan ta para central.
E conferencia a consisti di un programa sumamente diversifica, pa medio di cua profesionalnan di tur pais y entidad publico den Reino a participa na discusionnan interactivo. E conferencia a keda transmiti di forma digital for di un studio caminda algun representante di Taskforce y profesionalnan tabata fisicamente presente. E otro representante- y profesionalnan a participa di forma digital.
E diversidad aki a percura pa discusionnan interesante y bunita. Riba e prome dia a trata monitoreo y evaluacion. Ton Liefaard, un prominente profesor riba tereno di derecho di mucha, a splica con monitoreo y evaluacion no solamente ta contribui na un sentido di responsabilidad, pero tambe na un forma di traha mas eficiente. Aboubacry Tall, un profesional riba tereno di derecho di mucha cu ta traha pa UNICEF for di Senegal, a comparti su experiencia pa medio di su presentacion “Rights-based and equity-focused monitoring”.
E di dos dia a keda dedica na e impacto social di COVID-19 riba mucha y hoben. Riba e dia aki, profesor Emeritus Micha de Winter, un experto riba tereno di asuntonan social relaciona cu educacion, a participa na e discusionnan i a amplia riba e resultadonan di un investigacion cu recientemente el a conduci riba efecto social di COVID-19 riba mucha y hoben.
E iniciativa di UNICEF, #mimundonobo, tambe tabata parti di e programa. Como parti di e iniciativa aki, muchanan di entre 13 pa 18 aña por a comparti nan punto di bista tocante con nan mundo ideal lo mester ta despues di e pandemia. E hobennan a ricibi e iniciativa aki cu man habri, ya cu pa medio di dje a scucha nan bos. Ta e intencion pa traduci loke e hobennan a trece dilanti den implementacion nan cu ta beneficia nan. Taskforce mes tambe a expresa su intencion pa, den futuro, tene mas cuenta cu e bos i ideanan di mucha y hoben den su esfuersonan.
Taskforce di Reino pa Derecho di Mucha por mira bek riba un di 5 edicion exitoso di e conferencia anual. E conferencia aki a keda organisa pa St. Eustatius, den colaboracion cu Ministerio di Asuntonan Interior y Relacionnan den Reino.
Pa mas informacion, bishita www.ourchildrenourfuture.org.
