Na Haagse Hogeschool a tuma lugar un encuentro di Gabinete di Aruba pa studiantenan Arubiano riba e tema budgettering; con pa bai om cu bo cen.
PR di Gabinete di Aruba Sidney Kock a yama e grupo di studiantenan bon bini y a bisa di ta contento cu hopi studiante a acepta e invitavion pa ta na e encuentro aki. Tambe sr. Kock a bisa cu e encuentro aki a sali afor di e Ban Topa nan cu Gabinete di Aruba a tena aña pasa, na unda e studiantenan a bisa di ta sinti e nesecidad cu Gabinete di Aruba lo mester por organisa encuentronan riba temanan cu ta interesante pa e studiantenan.
Despues studiementor Shahaira Brokke den nomber di e mentornan a hiba palabra unda ela bolbe enfatisa e importancia di encuentronan asina pa duna informacion na e studiantenan cu por yuda nan durante di nan periodo di estudio.
E programa a consisti di dos orador unda e prome tabata Franklin Seute, autor di e buki “Living Rich as a Student in the Netherlands” y fundador di e plataforma “Living Rich as a Student” cu ta yuda studiante pa haya grip riba nan finanza y disfruta di e bida estudiantil sin stress. Den su presentacion Franklin a comparti tipnan practico, su mesun experencia y strategianan bon calcula con pa maneha bo placa mihor; di vivienda te cu compra nan diario; genera entrada y traha na un mindset financiero cu confiansa.
E di dos orador tabata Farley Julius van Heydoorn, fundador di BuroVAT y ta traha como advisor “debiteurenmanagement” na DUO, e instancia na Hulanda cu ta duna prestamo pa estudio. Van Heydoorn den su presentacion a conta riba su propio experencia cu debe y kico esaki ta haci cubo. Tur esaki ta conocemento cu e ta usa pa yuda hobennan pa haya grip riba nan finanzas.
E studiantenan na final por a haci pregunta y asina haya mas informacion adicional di ambos orador.
Gabinete di Aruba por mira bek riba un encuentro hopi exitoso. Na Haagse Hogeschool.
