Aruba Lions Club recientemente a tene su Feria di Salud completamente gratis, cu a tuma luga na Xavier University na Santa Helenastraat, Oranjestad. Durante e actividad, cu a cuminsa for di 8:00 am te cu 12:00 pm, e publico a beneficia di diferente examen y servicio di salud sin costo algun, danki na colaboracion di varios organisacion y fundacion comprometi cu bienestar di comunidad.
E Health Fair aki a reuni un grupo amplio di e partnernan, entre nan Xavier University, Mary Joan Foundation, Aruba Vision Center, FEPOH, QUOTA Club, Fundacion Smile Mobile y Fundacion ABO. E actividad a bolbe resulta den un éxito y tur persona cu a acudi a keda sumamente satisfecho pasobra nan a probecha di e oportunidad pa gratuitamente haci diferente chekeo preventivo.
Entre e servicionan cu tawata disponibel ta, control di colesterol, presion di sanger, nivel di sucu, examen di oido, control di bista, revision di pecho y abdomen, y tambe limpiesa di dentadura cu Fundacion Smile Mobile.
Tambe e publico por a beneficia di orientacion profesional di dr. G. Fun-A-Fat, kende tawata presente pa brinda conseho riba e remedinan cu e personanan ta uza, verifica si nan ta combina adecuadamente y splica cua ta e manera corecto di tuma nan remedi.
Despues di completa e examen, tur participante a haya algo chikito pa come y di bebe.
Si e demanda y e interes ta sigui crece, no ta exclui cu den futuro e actividad aki lo por extende tambe pa otro barionan di Aruba.
Pa termina Aruba Lions Club ta gradeci e publico cu a acudi na e Feria di Salud y ta pidi keda pendiente pa e siguiente actividad.
“We Serve”
