Durante 2 siman hobennan di Croatia, Spaña, Sint Maarten, Inglatera y Aruba a siña comparti cu otro nan forma di biba, come, cultura y tradicionan pero mas cu tur cos nan pensamento riba “Derechonan Humano”.  E projecto aki a facilita 30 hoben cu durante 12 dia a intercambia di topiconan, conoce norma y balornan sin lubida e parti culinario y cultural di cada pais.

Erasmus+ y CEDE Aruba tabata e anfitrion pa e prome encuentro di “entrecambio hubenil” unda a presenta actividadnan diario cu tabata inclui workshops, debatenan, role play, actividadnan den aire liber, ehercicionan y mas. Durante e transcurso di simanan e participantenan den e projecto a usa nan conocemento y hermentnan cu den forma di aprendisahe participativo, no formal y informal, den forma directo cu otro, siña con pa ehecuta e plannan aki den nan mesun comunidad.

E obhetivo di e topico “Derecho Humano pa tur hende” , “Human rights 4 all” ta pa crea concientisacion y conocemento di e topico y con pa aplike den e paisnan cu a participa den e prome encuentro aki.  Esaki ta duna e participantenan un bista con pa mehora y crea concientisacion pa promociona nos norma y balornan, libertad, tolerancia, democracia y respet pa derechonan humano. Tur esaki pa facilita un entrecambio rico den cultura, promoviendo diversidad y dialogo intercultural. E desaroyo personal di e hobennan ta di vital importancia unda mester aumenta nan confiansa y nan conocemento den materia aki. 

Hobennan di e forma aki ta siña con pa nan por dialoga cu otro y siña con pa yega na metanan specifico, unda ta aumenta nan conocemento den liderasgo, guia otronan den nan desaroyo personal y logra pa ricibi e confianza pa dialoga cu otro hobennan incluyendo esnan den dificultad. Hobennan di e paisnan cu a participa a ricibi hopi informacion y hermentnan pa haci cambionan den nan comunidad.

Cada dia hobennan di  Ocean Znanja (Croatia), Brisa Intercultural (Spain), Caribbean Education and Culture Foundation (Sint Maarten), International Service (UK), CEDE Aruba (Aruba) a traha nan schedule incluyendo norma y balornan, tayernan, ehercicionan y nan suculento platonan y informacion di nan parti cultural di nan pais.

Hobennan di Aruba encabeza pa Ashna Thijsen a percura huntu cu CEDE Aruba y Erasmus + di Union Europeo, hinca actividadnan den otro pa asina e hobennan aki conoce mas di nos Aruba.

Un resultado di un encuentro hopi emocional, unda ta tin charlanan y eventonan cultural cada dia. Aki ta trata di 5 pais y 27 diferente karakter y custumbernan diferente cu mester a adapta na otro. Locual cu a wordo gana di e encuentro aki ta empatia, respet, cordialidad, Amistad y union entre paisnan unda e mensahe final di comportacion y Convivencia di derechonan humano a wordo comprendi, comparti y awor por wordo transmiti den nan propio pais.

Danki sigur na CEDE Aruba, Erasmus + programa di Union Europeo pa un experiencia diferente y unico.

LEAVE A REPLY

Please enter your comment!
Please enter your name here