Despues di a conoce mas caso riba e “hacking” di cuentanan di WhatsApp, usuarionan mester cambia tres configuracion di e aplicacion vincula cu privacidad, archivonan ricibi y verificacion di profile, segun e recomendacionnan di e experto den siguridad Zak Doffman, publica recientemente den Forbes.
E specialista, fundado di e empresa Digital Barriers cu ta busca solucionnan di vigilancia avansa pa defensa, siguridad nacional y lucha contra terorismo, a sali di un caso unda cu piratanan tabata gaña e usuario, for di un cuenta ya secuestra di un di su amigonan, pa e comparti un codigo manda via un mensahe normal na su telefon.
Verificacion den dos paso
E operacion aki ta permiti cu e atacantenan tambe por apodera di su cuenta, cual recuperacion por ta un tedioso proceso.
No obstante, un di e prome accionnan cu Doffman ta recomenda ta activa e Verificacion den dos paso di WhatsApp.
Pa esey, e usuario mester ingresa den e seccion “Account”, cu ta den “Configuration”. Posteriormente, e aplicacion lo pidi pa hinca seis number y email pa recupera e aceso den caso cu lubida e cifranan poni.
E procedimento ta cortico y ta tuma menos di un minuut. “Tur loke WhatsApp ta uza mester uza e configuracion di siguridad aki,” e experto a recalca.
Di e manera aki, si un pirata informatico podera di bo cuenta di WhatsApp, e no por completa e secuestro sin conoce e PIN of codigo di verificacion.
Archivo di potret y video
Di un otro banda, Doffman ta adverti cu solamente mester warda potret y video ora cu e usuario conoce e remitente y ta sigur cu e archivonan multimedia a wordo tuma pa su contacto y no descarga for di Internet pa despues comparti atrabes di WhatsApp.
Di lo contrario, e usuarionan ta core e riesgo cu e potret of videonan di origen desconoci contene un codigo malicioso cu por blokea e dispositivo of afecta e aplicacionnan.
“Warda automaticamente e potretnan di WhatsApp ta manera laga e porta di bo cas habri; ta hiba cun’e un nivel di riesgo cu no ta un necesidad y por daña bo telefon,” e specialista den cybersecurity Jake Moore a splica.
Pa evita riesgo, ta recomenda drenta den e seccion “Chats” di e area di “Configuration”, y desactiva e opcion “Save in file” riba iPhone of “Visibility of multimedia archives” den Android.
Ken por agrega su contacto na grupo?
Finalmente, Doffman ta sugeri drenta den e ahustenan di “Account” y den e link di “Privacy” y limita kende por agrega su contacto na grupo.
Den e caso aki, lo recomendabel ta selecciona e opcion “Just my contacts”. Ademas e tecnico a precisa cu ningun di e segmentonan di e seccion aki lo mester ta disponibel pa “Everyone” y por lo menos limit’e na bo amistadnan.
E pautanan aki lo evita cu piratanan informatico accede na bo cuenta, ataca bo contactonan atrabes di ‘softwares” malicioso of cu, hasta, por consolida estafanan financiero.
“Bo mester cambia bo configuracion y mester haci’e awe,” e experto a adverti.
