Wageningen University & Research (WUR) ta anuncia cu e lo ta na Aruba di 5 mei pa 9 mei cu un delegacion pa presenta e resultadonan di proyecto TRUPIAL, un iniciativa unico cu ta ilustra un vision inclusivo di naturalesa pa e futuro di Aruba. E vision ta un resultado di un trabou cu a wordo haci conhuntamente cu e comunidad local durante un periodo di 2 aña. E bishita aki lo encera un sesion di conocemento cu Prome Minister Mike Eman, un sesion di presentacion pa Conseho di Minister y Miembronan di Parlamento, y finalmente un anochi di presentacion pa comunidad di Aruba.
Encabesando e bishita aki ta Peter Verweij, investigado y autor principal di e rapport “Aruba 2050 – A Nature Inclusive Vision” y e catalog cu ta compaña e rapport aki. E documentonan aki ta presenta un mapa di direccion practico y uno cu ta inspira con pa integra naturalesa den Aruba su desaroyo economico y social, specialmente den sectornan manera turismo, agricultura, infrastructura, y conservacion di herencia.
TRUPIAL ta forma parti di e KB36 Knowledge Base Programme di “Biodiversidad den un Sociedad Inclusivo di Naturalesa”, un programa cu ta wordo funda pa e Ministerio di Agricultura, Pesca, Calidad di Cuminda y Naturalesa di Hulanda (LVVN), y cu ta cay bou di encargo di Dr. Lawrence Jones-Walters. E vision pa Aruba a wordo desaroya pa medio di un proceso colaborativo, unda cu e vision y catalog ta trece hunto bosnan y conocemento di organisacionnan manera representatenan di gobierno, NGOs, sector priva, y ciudadanonan di Aruba. E manera colaborativo aki a sigura cu e resultado ta refleha ambicionnan uni y conocemento practico local. E resultado ta presenta scenarionan den futuro hopi visual hunto cu ekipo di planificacion cu ta pone enfasis riba e riesgonan si Aruba continua cu su trayectoria di “business-as-usual” pero tambe ta demostra e potencial transformativo di alternativanan cu ta inclusivo di naturalesa combina cu Aruba su identitdad local.
Como parti di e bishita, Peter Verweij y Dr. Lawrence Jones-Walters lo tene un anochi di dialogo dia 7 di mei 2025 na Fort Zoutman, Oranjestad pa refleha e resultadonan di e proceso colaborativo. E evento lo conta cu tres diferente dialogo den forma di ‘panel discussion’ – caminda cada discuscion lo adresa e desafionan clave cu a keda identifica den “Aruba 2050 – A Nature Inclusive Vision”. Cada topico lo conta cu participacion di diferente representantenan di sectornan clave y e combersacionnan lo wordo modera pa Dr. Jones-Walters. E discussionan tin como meta pa bay mas profundo den intercambio di idea y tambe identifica oportunidadnan pa implementacion. E desafionan y retonan cu lo wordo presenta ta lo siguiente:
- Mantencion, mehoracion y restauracion di naturalesa: Protehando biodiversidad y maneha degradacion den bista di stress climatico, desaroyo, y especienan invasivo.
- Maneho di turismo: Trece un balansa husto entre crecemento economico y igualdad social, teniendo na cuenta presionnan ambiental y e impacto espacial di un sector di turismo cu ta sigui crece.
- Crecemento di e poblacion y expansion urbano: Manehando e uso di tera y desaroyo di infrastructura mientras ta salvaguardia naturalesa y e bienestar di comunidad.
Personanan cu ta interesa pa asisti e anochi di dialogo pa comunidad, por registra nan participacion via e proximo link: https://forms.office.com/r/6g4JNTastz. Tuma nota cu cupo pa participacion ta limita. Despues di e presentacion, e documentonan lo wordo haci publico pa asina tur hende cu ta interesa por lesa esakinan.
Finalmente, e proyecto TRUPIAL ta ofrece un mapa pa esnan responsabel pa traha maneho, e planificadornan, y e comunidad pa salvaguardia Aruba su biodiversidad unico, herencia cultural, y economia sostenibel. E lansamento di e vision aki pa Aruba ta marca un logro grandi den desaroyo di trahamento di maneho unda cu e por ta basa riba ciencia, y un comunidad informa cu por guia e isla den direccion di un futuro resiliente y prospero.
Pa mas informacion por manda un email na info@acf.aw.
