Fundacion Arte Pro Arte ta presenta e Expo Beyond Words di Stanley ‘Stanga’ Heinze dia 15 di October pa 8or na Galeria di UNOCA na Stadionweg 21. E expo aki lo ta durante un luna den e Galeria di UNOCA.
10 ana pasa Stanley Heinze como un amante fervor di arte a cuminsa dedica su mes na fotografia despues di a atende un curso di fotografia organisa pa Ateliers. Despues di esaki ela sigui profundisa su mes cu hopi entusiasmo riba e tereno di digital art.
For di tempo cu e tabata adolescente e tabata dedica su mes na poesia y teatro y semper e ta un amante grandi di arte. E tin un aprecio grandi pa tur ramo di arte: tur clase di musica y muy en particular jazz ,arte visual moderno, poesia, baile moderno y teatro inovativo. Tambe semper e ta apoya nos artistanan arubiano pa saca na album di musica, pa presenta nan obra di teatro y especialmente e generacionnan nobo e ta apoya nan den nan arte y poesia pa sigui expresa y presenta.
Y awo a bira tempo pa Stanley mes demostra su talento ‘scondi’ cu durante 10 ana ela elabora su so sinta den su studio na cas dilanti di su computer…
Diferente di nos artistanan renombra a apoya Stanley pa bin dilanti cu su obranan, pasobra manera cu un di e artistanan renombra a bisa: Mi no a wak un trabou di arte digital di tanto nivel ainda, manera esun di Stanley”. Stanley ta revela, cu su obranan ta nace for di su experiencianan den bida E sentimientonan cu ta brota for di su paden ta forma e base di su inspiracionnan.
Stanley tin un coleccion enorme di portetnan cu e ta saca regularmente. Y e ta scohe un portret cu ta coresponde cu un sentimiento cu e ke traha cu ne. Y e trabou no ta keda eynan. E ta haci uzo di e technicanan di arte digital pa haci di e portret aki bira un obra artistico.
E tema di e expo aki ta Beyond Words, Inner Outer, cu otro palabra su obranan ta bay mas leu cu palabra y ta pone luz riba e discrepancia serca e ser humano entre ‘su paden y e manera cu e ta aparenta den e mundo exterior’.
No perde e ocacion pa admira e excelente arte di Stanley Stanga Heinze, cu ta spectacular y na mes momento subtil. Tambe lo tin oporturtunidad pa ricibi gruponan y oranisacionnan cu ke haya un tour y splicacion riba e obranan di Arte aki.
Danki na Unoca y PBF cu e exposicion aki a bira posibel y danki tambe na CedeAruba, DCA, Web y Setar cu a haci posibel cu skolnan por bishita e exposicion aki. Y tambe nos ta gradici e sponsernan Martijn Trading y Tec pa nan apoyo.
Fundacion Arte Pro Arte
