Dianan 18, 19 y 20 di november 2026 tin oportunidad pa bishita e exposicion titula “50 aña di Ceramica, Arte y Creatividad” di Lia Maldonado.

Lidia Maldonado-Erasmus, miho conoci como Lia, lo expone su trabou celebrando 50 aña den artesania. Na aña 1976, Nacionnan Uni a inicia un programa di artesania den Caribe unda un docente Hulandes a bin Aruba pa duna curso di ‘pottery’ y ceramica.     E curso a inicia na Fundacion Artesania Arubiano unda Lia a sigui e curso y a traha te cu november di aña 1981.

Lia a cuminsa cu studio di porcelana na “Academia Arte y Hobby” na Colombia y a duna les di fabricacion di porcelana. Na aña 1989 Lia a habri “Creative Hands” na Socotorolaan, Oranjestad unda el a cuminsa cu su Studio di ceramica. El a traha hopi recuerdo pa tur tipo di ocasion manera bautismo, prome santa comunion y matrimonio. Tambe Lia a pinta hopi azuleho, tegel di cushina y di baño pa diferente cas na Aruba. Lia ta traha riba tela, canvas, ceramica y mas. Lia a habri pa publico cu un gran variedad di adorno pa Pasco. Lia y su team a traha cu varios hotel y restaurant na Aruba y tambe cu Aruba Touristen Bureau, ECO destination y De Palm Tours entre otro.

Na aña 1995 el a lanta un grupo di mucha y tabata directora di e grupo “Twinkle Lights”. Cu e grupo “Twinkle Lights” a duna diferente presentacion, entre otro na Cas di Cultura y a deleita publico cu nan shownan.

Na aña 2012 Lia a obtene e Seyo Nacional pa Artesania, inicia pa Gobierno a traves di Departamento di Cultura Aruba pa reconoce y certifica tur artesano cu tin producto traha na man localmente. Na aña 2020 Cosecha a organisa un competencia. Artesanonan por a participa cu un obra nobo. Lia a participa cu su diseño “Divita” – Divi Tree Aruba. DIVITA a resulta e ganador di e competencia. 

Actualmente Lia ta dedica na traha riba pedido y duna diferente workshop na su Studio Creative Hands na Oranjestad. Entrada pa e exposicion ta gratis. Bin admira un trayectoria di arte, creatividad y inspiracion. No perde e oportunidad pa bishita e exposicion unico y interesante aki.

Exposicion ta habri pa publico, unda Lia mes lo ta presente:

18 nov.: 10 a.m. – 1 p.m.   –    3 p.m. – 7 p.m.

19 nov.: 10 a.m. – 1 p.m.   –    2 p.m. – 5 p.m

20 nov.: 10 a.m. –  1 p.m.  –    2 p.m. – 5 p.m.