‘Empowered Women Exporters’ ta un proyecto cu Departamento di Asuntonan Economico, Comercio y Industria y su unidad Exprodesk, den colaboracion cu Sra. Taiana Mora di NEX Consulting. E proyecto aki a start na juli 2019 y a consisti di 4 stap, y despues di casi 3 aña, diabierna ultimo dia 3 di juni 2022, un grupo di seis dama y un cabayero a finalisa esaki exitosamente y asina ricibi nan certificado for di Minister di Economia, Comunicacion y Desaroyo Sostenibel, Sr. Geoffrey Wever. E participantenan cu a ricibi nan certificado durante e ceremonia teni na Aruba Ocean Villas, ta Srta. Valeria Gomez, Sra. Suzy Maduro, Sra. Sharina Gumbs, Sra. Vanessa Hollander, Sra. Virginia Rasmijn, Sra. Osyth Henriquez y Sr. Dave Martinus.
E meta di e proyecto di ‘Empowered Women Exporters’ ta pa empodera, educa y guia empresarionan femenina na Aruba pa por exporta nan producto of servicio pa medio di varios training, tayer y seminario. Despues di a sigui e trainingnan aki, e grupo di shete participante a dicidi pa forma un aliansa strategico pa intercambia di experiencia, yuda y sostene otro den diferente proyecto. Atrabes di e trainingnan e participantenan a traha un Export Action Plan pa exporta nan producto of servicio. Den stap 4 e grupo di profesionalnan aki a pasa door di un ‘Implementation Lab’ na unda nan tawata tin e reto pa no solamente aplica loke nan a siña pero tambe prepara pesentacionnan pa yuda otro profesionalnan femenino pa expande nan negoshi. Durante e pandemia, e participantenan di e proyecto aki a duna bek na comunidad y asisti hopi negoshi local cu e proyecto ‘We’re Open for Business’.
Proyectonan manera ‘Empowered Women Exporters’ ta contribui na e desaroyo di economia di Aruba. Ora un pais ta exporta producto of servicio, e actividad aki ta trece placa pa e pais cu e resultado cu e GDP ta subi cu e exportacion. Ademas exportacion ta crea mas produccion, mas empleo y entrada. ‘Empowered Women Exporters’ ta funcionando manera un ‘business incubator’, aunke e no ta esaki oficialmente, pero e participantenanan ta comparti nan experiencia cu otro, ta sostene otro, ta partner cu otro den diferente otro proyectonan y ta promove asina e ‘entrepeneurship’.
Exprodesk ta gradici tur participante di e proyecto ‘Empowered Women Exporters’ pa nan iniciativa pa sostene otro den e mundo di negoshi y exportacion. Exprodesk kier a invita tambe tur otro comerciante local cu ta interesa pa expande nan negoshi y cu lo kier sa mas con nan tambe por exporta nan producto of servicio den futuro, pa like e Facebook page di Exprodesk door cu nos tin mas training interesante programa e aña aki pa asiti nos empresarionan pa discubri diferente oportunidadnan y posibilidadnan pa inova, adapta nan ‘business model’ y sigui crece. Tambe Exprodesk lo organisa e aña aki ‘Export Week 2022: Conquering New Horizons’ cu lo ta di 27 di juni pa 1 di juli 2022.
Pa mas informacion over di ‘Export Week 2022: Conquering New Horizons’, por tuma contacto cu sra. Sharon Meijer via: s.meijer@deaci.aw
