Oracion ta lanta nos nivel di inmunidad contra pica, mescos cu remedi,vitamina, bon alimentacion, y drumi suficiente ta defensa di nos curpa contra tur malesa.
Oracion ta nifica comunica nos mes cu Dios constantemente, y asina evita cu maldad y inmoralidad por drenta nos bida.
Ta dificil pa un hende tin un bida inmoral, bibando den pica y na mes omento tin un bida constante di oracion. Pasobra oracion ta comunica nos cu Dios y Dios ta cuida nos y aleha nos for di pica.
Pesey e palabra ta bisa cu un hende no por bisa cu e ta stima Dios y e ta odia su ruman.
Otro bon ehempel tambe cu tur hende mester tene cuenta cune ta, cu un hende no por bisa e ta stima Dios y e ta biba den adulterio, maltrata su esposa y yuinan, uzando droga y alcohol.No ganja bo mes.
Oraccion ta limita pica den nos bida, e ta haci nos fuerte spiritualmente, nos lo tin dominio riba e carni, pasobra ora nos tin falta di oracion den nos bida, nos tin falta di presencia di Dios, e ora ey nos carni ta lanta, pasobra nos di interes den cosnan di e mundo ta mas grandi cu nos tin interes den sirbi nos Dios.
Ta esey ta e gran peliger cu ta habri porta pa scuridad den nos bida, pasobra nos adversario e diabel ta cana rond buscando ken e por devora, y caminda tin falta di oracion y un bida sin temor di Dios, eynan e diabel ta pone su campamento.
Awendia bo ta hanja hende cu ta aleha for caminda di Dios, haci tur locual cu nan kier, pa un temporada,drenta tur sorto di bagamunderia y libertinahe, expone nan curpa na perversidad, sin tene cuenta cu e enemigo ta uzando nan pa provoca tentacion den bida di otro hende.
Pesey ta para scirbi den Mateo 26:41: Keda vigila y haci oracion, pa boso no cay den tentacion, e spiritu ta boluntario , ma e carni ta debil.
Mescos e Palabra di Dios ta mustra nos cu tur luho y detaye den Galationan 5:19-21 cu esnan cu ta participa of practica e obranan di carni lo no hereda e reino di Dios.Pasobra pa falta di conocemento, temor di Dios, rebeldia , of rechaso di e palabra di Dios, hende ta haci cosnan cu no ta cumbini.
Na Sero di Oleifi Hesus a bolbe corda Su disipelnan bisando: Haci oracion pa boso no cay den tentacion.
Den e oracion di nos Tata nos ta sinja con a pidi Senjor pa libra nos di tentacion.
Un persona cu ta hiba un bida yena cu falta di pordon, ta un porta habri pa tentacion, ya cu falta di pordon ta distancia nos curason for di Dios. Falta di pordon ta fria hende su oracion na Dios, pasobra orguyo, rabia y odio ta domina.
Lucas 18:1 ta bisa nos: Y ora e tabata conta nan un parabola pa mustra nan cu nan mester haci oracion tur ora bay y no desmaya, pasobra asina nos lo logra cu Dios ta haci husticia.
Tene cuenta cu oracion , ta poderoso, y cu mundo henter mester di oracion, nos ta bibando den ultimo tempo, y esun cu no ta biba un bida di oracion, lo sinti e falta di oracion den su bida, pasobra oracion ta nos proteccion cu Dios mes ta duna nos, y nos tur sa cu no tin nada mas poderoso cu poder di Dios.
Poderoso ta nos Dios, y grandi den misericordia y berdad, pasobra Dios ta fiel,y semper bondadoso
.
Sinceramente, Pastor Marcel Balootje
