Ken ta e enemigo di nos bida, ken ta esun cu a bini solamente, pa horta, pa mata y pa destrui,
Su nomber ta e diabel, satanas, kende ta odia ser humano, pasobra nan tin contacto cu Dios, pasobra nan ta creacion di Dios, y Dios kier pa nan tur wordo salba y no bay perdi.
Pero mas grandi su Odio ta bira contra esnan cu a entrega nan bida na Cristo Hesus y a bandona e malicia di mundo, y a pone Cristo na prome lugar y tin e autoridad pa reprende e diabel, e maligno den nomber di Cristo Hesus, y mande pa tera seco.
Porta te ainda den bo bida bo no a scucha esey .pero e diabel ta e autor di tur orguyo, mentira y rebeldia, y ta pesey Cristo Hesus a bini na mundo pa destrui e obranan di e diabel.
Y E a duna autoridad na tur esnan cu ta kere den dj’E pa saca demonjo den nomber di Cristo Hesus.
Pasobra E a bisa e senjalnan aki lo sigi esnan cu ta kere den dj’E y E a menciona esaki na prome lugar cu den Su nomber nan lo saca demonjo, pasobra e ta nos adversario, cual tur esnan cu ta stima Cristo ta den gera cune.
Awor ora hende no kier pordona, of ta practica falta di pordon, y ora orguyo y rebeldia ta presente den bida, e porta di e bida ta habri pa e enemigo,pasobra esey ta tapijt corra pa e diabel cana riba dje.
Falta di pordon ta wanta hende den pasado,falta di pordon ta stroba crecemento spiritual, falta di pordon ta danja relacion di hende cu otro y ta kibra amistad.
Hende cu no kier pordona , ta prefera bay hues y kibra matrimonio, pasobra nan no kier habri nan boca y pidi despensa, pa motibo di orguyo y rebeldia.
Falta di pordon ta produci rabia, cu ta cambia den stress, depresion y amargura ora hende no kier laga los,y amargura por contamina henter un cas ( Hebreonan 12:14-15), y asina herida famia completo.
Ora amargura sigi wordo fortalesi pa rebeldia y orguyo e por afecta salud mental di hende.
Pesey den hopi caso caminda dokter no ta compronde e motibo di dolor di cabes, e motibo di presion halto y sucu ta subi baha, e calmante for di paracetamol te valium no ta yuda, of remedinan mas fuerte, ta motibo cu tin algo scondi den e bida, un falta di pordon, un duele di pasado, y mas cu tur cos e orguyo y rebeldia ta domina e bida cu asina e persona no ta laga los.
Aki nan nos a yega na e lugar caminda solamente e Sanger di Hesus por kibra e fuente di falta di pordon, orguyo y rebeldia, pasobra e Sanger Hesus cu a wordo derama na crus di Calvario hamas lo perde su poder.
Pesey e palabra di Dios ta bisa nos cu si nos confesa nos pica, E ta fiel y husto di pordona nos, nos picanan y libra nos di tur inhusticia (1 Juan 1:9).Pero tambe e palabra di Dios ta bisa nos: Cu esun cu sconde su pica lo no prospera, ma esun cu confesa su pica lo alcansa misericordia.
Sea sobrio , sea alerta. Boso adversario, e diabel , ta cana rond, manera un leon cu ta grunja,buscando ken e por devora. ( 1 Pedro 5:8).
Keda vigila y haci oracion, pa boso no cay den tentacion, e spirito ta boluntario, ma e carni ta debil.(Mateo 26:41).
Sinceramente Pastor Marcel Balootje
